Vaten:Koyo Berz/Bırı

Wikipediya ra ensiklopediya xosere
< Vaten:Koyo Berz(Bırı ra ame ardış)
Xıl de be pusula Xıl de cıgeyrayışi

Bırı-çırı yan zi pêfetılneyenı, tepıştenı u veşnayenı: Bırı bı dı gürubana kay bena. Na kay enbol ki cıwênan ser o yan zi meydanandê bol herayênan dı kay bena. Wırna gürubi, wırna beri, wırna kışti vanê hendê pê bê. Jew jewi ra vêşi nêbeno. Wexto kı kenê na kay kaykerê, şêlıg heme xo miyan dı cayê dı komê pêser beno. Ê komi miyan ra dı merdımi weçineyênê u hergı jew ravêreno kıştê u beno mesulê gürubdê xo. Ê dı merdımi zi vanê xo rê ê şêlıgi miyan ra merdımi weçinê. Qandê kı neheqey nêbo ê şêlıgi miyan ra jew xo desti miyan dı qırş degêno, nımneno. Kê kı o qırş di o en sıfte dest bı weçinayenı keno. Tabi fınê ra ê şêlıgi miyan ra merdımanê xo nêweçineno. Nê enbazan ra kê kı o qırş diyo o en sıfte dest bı weçinayenı keno u jewi xo rê weçineno. Ey dımı o bin xo rê jewi weçineno. Bı no hesab a jew o jew o bin ê şêlıgi miyan ra merdıman weçineno. Heme çi bı wardê demokrasi, heqey u raştey miyan dı beno. Yanê fınê merdımê ekibdê A, fınê merdımê ekibdê B’ey merdımê xo weçineno u r! avêrneno kışta xo. Kes nêvano çı rê to no weçina, no nêweçina.

Tabi ê merdımê ser güruban zanê kam vêşi remeno, kam nêremeno. Qandê coy xo rê merdımi weçinenê. Pê dımı pê dımı jew bı jew merdımê xo weçinay tepey a taxımanê xo kenê hadre. Ju ju fını jew merdım ferı yeno, yanê vêşi maneno. O merdım zi ninan rê beno hekem. Taxımê xo kerdi temam tepey a, çorşmey ra tay si anê wertedê ê meydani dı ronanê u xo rê qintı vırazenê. O kı xo ra çaket, postal yan zi çiyê xo yê gırani vejeno, beno a qintı dı ê siyan ser o ronano. (Qandê kı cı çıman vero bo u kes nêtıro). Qinta xo vıraştı tepey a vanê yazı türe çekerê kı, ka kamdo kışta zeri dı, kam do kışta teberi dı vındero. Taxımê kışta zeri vanê a qintı bıpawo u merdımanê kışta teberi bıfetılno, tepêşo yan zi destê xo pey ra pıro do u inan bıveşno. Ê kışta teberi zi venê mabêndê qintı u merdıman ra ravêro u merdımanê kışta zeri bıveşno. Yazı türeyê xo çekerd tepey a, taxımê kışta zeri rê jew zi kışta teberi rê kewno. Yanê jew zere dı jew teber a maneno. Ê kışta zeri merdımanê xo çorşmedê qintı ra vılla keno u qintı dano pawıtenı. Ê kışta teberi teberdê qintı dı çorşmey ra benê vılla u tetik dı pawenê. Merdımê taxımdê kışta zeri merdımanê kışta teberi fetılnenê, merdımê kışta teberi zi inan ver remenê. Ê kışta zeri destê xo merdımandê kışta teberi ra kê ro do o veşeno. Merdımandê taxımdê teberi ra zi kam mabêndê merdımandê kışta zeri u qinta kı ê pawenê a qintı ra ravêro, ê zeri veşeno. Wexto kı merdımêdê kışta teberi mabêndê merdımêdê kışta zeri u qintı ra ravêreno bırı vano. Qandê coy zi namey a kay bırı neyayo pa. Wexto kı merdımandê teberi ra jew merdımanê kışta zeri ravêrno, kes destê xo pıro nêdo u şıro lınga xo qinta no, merdımê zeri heme fınê ra veşenê u qalêda kışta taxımdê teberi bena ê zeriyo. Tabi na kay rê zahf vazdayenı, remayenı, çıvi xodayenı, hüner u marifet, şeytaney u baqıley, bı zıvrana! remayenı u xo pawıtenı lazım a. Vanê kes zahf çapık bo u gamê gırdi çekero kı kes bışo zorê hemverdê xo bero. Vanê gamê kesi zey gamandê gavılgaziya bê. Wext beno taxımê kışta zeri merdımanê taxımdê kışta teberi hemını veşnenê, cı ra jew teniya maneno, ey fetılnenê-nêfetılnenê nêşenê tepêşê. Wext beno o jew merdım o kı mendo ey di-rê dewan ser ra çerx kenê u fetılnenê, qandê tepıştenı u veşnayenı. Ey zi bıveşnê qalêda xo fênê taxımdê hemveri ser.

Wexto kı taxımê kışta zeri merdımanê taxımdê kışta teberi bıveşno o qala xo fêno ser, wexto kı ê teberi inan hemını bıveşnê ê qala xo fênê inan ser. Wext beno ju kaya ninan rojê ramena, labırê fına zi kes nêşeno qala xo kesi ser fino. Bahdê kay qalê kê vêşi kewtê kê ser, vanê kışta kı qali kewtê ser a kıştı cerimey xo banco. Tabi cerime antenı zi gorey bazardê mabêndê ninan o. Verê kaykerdenı çıçi ronayo, çıçi bazar kerdo vanê o biro ca u bıbo. Heme çi çerçewedê demokrasi miyan dı roneyêno u beno. Qewlo kı deyayo u roneyayo kes ey! rê itıraz nêkeno. Bilakis ey rê vêşi vêşi itaat kenê u anê ca. Na ju zi nişanê demokrat biyayenda ma ya. Dı nê nuştedê xo dı çiyo kı mı derheqdê kayda bırı dı zana mı ard zıwan u nuşna. Beno tey kemey u şaşey bıbê, labırê şıma ê kı zanê bınuşnê u raşt kerê. Heta amornada binı dı weşey dı bımanê...!



Kay Kay u Wextravêrdene

Bırı  • Cırit  • Çeq  • Çımpıstıkı  • Çıtme eştenı  • Dahfı  • Delame  • Delo  • Derabul  • Dısmalı nımıtenı  • Dısmalı remnayenı  • Eskıjekı  • Gogı  • Govendı  • Gozçal  • Güle  • Hakmêş  • Hakçıq  • Herek  • Hirê lıngı  • Hêlıkı  • Kapok  • Kelasingı eştenı  • La eştenı  • Pere nımıtenı  • Pıst  • Qelanqizık  • Roverdıkı  • Salgoz  • Serê Serı  • Siya nişani eştenı  • Siya qüweti eştenı  • Tazi u Arwêş  • Tir u Tirküvan  • Tul  • Têmane  • Verg u Şıwane  • Veyvekı  • Yazı-Türe  • Zewcı-Ferı