Karber:Tekin Yldrm

Alık u Fatıka Demé welaté de wau u bıray benê, namé lazéki Alık, name çêneke Fatıke bena. Ni, maé ra sey benê. Maa xo ke mırena pi, dêmar ano Alık u Fatık'e ré. Na dêmari ra ki lazek u çênêké bené.

Dêmar, domanunê xorê yemeg pozena, Alık u Fatık'e rê ki wela adırı kena lop dana cı. Alık u Fatık'e sonê mal u gau ver. Mal de berbenê, jivené manga bore yéna ra zon vana: - Alık, Fatik sıma ça bervéné? Alık u Fatık’e Manga bore ra vané: - Maa ma merde, pié ma démari arde ra maserı, a ki maré heşireni kena, Domanuné xore yemeg pozena, mare ki wela adıri ana. Ma vésan verdana. Ni, wa u bıra ke nia vane, manga bore vana:

-Alık, Fatık bêrê iştirunê mı rakerê/akeré tede werd esto xorê vezé borê. Alık u Fatık'a iştirunê manga bore kenê ra tede hazar türlü werd beno, vezenê wenê xo kené mırd. Dêmar domanunê xorê şir, zırfeti, keska, bişi, roneni pozena. Oncia ki niadana ke domanê xo benê zar. Alık u Fatık'a benê hewl.

Rozê dêmar lazê xo Alık u Fatık'e de rusnena mal vér, vana: - Ala tey so, ni sekenê? Çı wenê? Lazê dêmari Alık u Fatık'e de sono mal verı. Fatık'e, lazeki ra vana: - Bıra toke tıka çı dı çê de maa xora mevaze. Lazek vano: - Ya, ez névan. Lazek Sond weno. Alık u Fatık'a sonê iştirunê manga bore kenê ra cıra werd vezénê ané wenê. Bıra ki tey weno. Sonde ke mal u gau anê çê, Démar lazé xora perskena, vana: - Alık u Fatık'a mal de çı werd? Lazek vano: - Towa nêwerd. Roza bine dêmar çêna xo temey kena Alık u Fatık'e de rusnéna mal ver. Alık, Fatık u waa xo çéna démar ra sonê mal ver. Fatık`e çéneke ra vana: - Waê to ke tıka çı di maa xora mevaze. Çêneke vana: -Nê, nêwanune. Alık u Fatık'a oncia soné iştirunê manga bore kenê ra, werd vezenê anê piya wenê. Çêna dêmari xo kena mırd verê des nenıkunê bêçıkunê xo kena pırr tey ana çê. Maa xora vana: - Dayê sıfre noni (xonçıke) biya rone. Maé sıfre / xonça noni ana nana ro, çêneke verê nenıkunê xora werd vezena sıfrey sero nana ro, çêneke u maa xora wenê. Rozê cinike xo nana ro nêweşéni kuna cıle. Sonde mêrdê xo ke yeno çê, niadano ke cinika xo cılede ra vano: - Cinik çıkê to esto? Cinike vana: - Ez zaf nêwesunê, torê niyaz pozen so jiare ala jiarenêweşiya mırê sê vana. Cinike, niyaz pozéna dana mêrdê xo rusnena jiare. Mêrdê ke çê ra beno tever, cinike cıle ra vejina, raa kılme ra sona. Rew sona, sona kuna zerê khulerê jiare. Tede xo dana we. Mordemek yeno vere jiare, niaz keno vıla, jiare ra perskeno vano: - Jiarê, cinia mı nêwesa derdê xo, dermanê xo çıko? Cinike zerê khulerê jiare ra vana: - So, manga bore sare bıbırne ciniya to bena wes. Mordemek cereno ra yeno. Cinike khulerê jiare ra vejina raa kılme ra yéna çê oncia kuna cıle. Mêrdê xo yeno çê. Cinike vana: - Jiare tora seva ke, derdé neweşia mı çıbıyo / Çıko? Mêrde vano? - Jiare vake, manga bore sare bıbırne cinika to bena wes. Cinike vana: - Eke heniyo, so manga bore bia sare bıbırnime. Lazê dêmari, maa xo hesneno, sono Alık u Fatık'e ra vano. - Ma u piê mı manga bore sare bırnénê. Alık u Fatık'a sone manga bore ra vanê: - Pi u dêmara ma ra to sare bırrnenê, ma sebıkerime? Manga bore vana: - İné ke ez sare bırnıne sıma ostıkunê mı berrê qurçık kerê, sıma ke bivêsani şerê qurç ra ostikuné mı vézé biaré zere de neway tür werd esto veje xo ré borê.

Dêmar u mêrdê xora anê manga bore sare bırrnenê, gosté xo wenê. Alık u Fatık’e ra ki ostıkunê manga bore benê kenê qurçık, herg roze ke bi vesanı sonê qurç ra ostıku vezenê werdê zeré astıku vezené wené.

Dêmari, niadana ke oncia Alık u Fatık'e ra benê hewl, çêna u lazé xo béne zar. Çéna xora vana: - Ala nine bıpiye, nine dima so. İi çı wenê? Çêneke, Alık u Fatık'e dıma sona, niadana ke / vinena ke Alık u Fatık'a qurçé kémér ra ostıki/astıké manga bore veti, zeré ostiku / astıku ra werd vetı werd. Çêneke sona maa xora vana. Hal mesela nia nia. Démar oncia bena nêwes kuna cıle. Sonde mêrdê xo yeno ke cinika xo bia nêwes, vano: - Cinik, çıkê to esto? Cinike vana: - Ez zaf nêwesune, torê niaz pozen so jiare, ala jiare neweşia mıra sêvana! Cinike niaz pozena dana mêrdê xo rusnena jiare. Eve xo ki cıle ra vejina raa kılme ra sona kuna qulerê jiare, tede xo dana we. Mordemek yeno niaz keno vıla jiare ra perskeno vano: - Jiarê, cinika mı nêwesa sebıkerine? Cinike zerê kuleré jiare ra vana: - Alık u Fatık`a sare bıbırrne cinika to bena wes. Mordemek cereno ra yeno, cinike oncia kuléré dare ra vejina raa kılmera yena kuna cıle. Mordemek yeno çê. Cinike mérdé xo ra vana: - Jiare tora sêvake? Mordemek vano: - Jiare vake ‘Alık u Fatık'e ra sare bıbırne cinika to bena wes’. Cinike vana: - Meste ronén pozén, ben danu Alık u Fatık'e ine ame sarê bırrneme. Roza bine cinike ronen pozena bena verê Alık u Fatık'e de nana ro. Alık u Fatık'a roneniya xo wenê, mirçıké yena nisena asıne pençeri ra wanena, vana: - Mirçe mirçe mirçelekê mıdê tené puselekê sıma ra vanune qese u xevereké. Alık u Fatık'a xo xoré sasbenê! vanê: - Nu çıko? Na mircıke ça nia wanéna? Ronena xo wenê, mirçıke oncia wanena, vana: - Mirçê mirçê mirçêlekê, mıde tené puselekê, sıma ra vano qese u xeverekê. Alık u Fatık'a tenê roneni erzenê veré mirçıke, mirçıke ronén wena wanena vana: - Alık urze bıbero ve kıla ( kulıke) Fatık'e ro bıreme şerê. Meste benê sıma sare bırrnenê.

Alık beno ve kıla Fatık'e ro remeno, Fatık’e verdana ve Alık'i dıme remenê sonê. Zaf ke sonê senık ke sonê, rastê zu heni/hini yenê. Alık zaf biyo têsan yeno ke heni de awe bısımo, Fatık'e vana: -Alık, na heni de awe mesıme. Na heni, heniyê qatıruno / golıguno. Alık awe nêsımeno oncia kunê ra raê sonê. Zafke sonê senık ke sonê rastê jü heni yenê. Alık oncia yeno ke heni de awe bısımo, Fatık'e vana: - Alık mesime, na heni heniyê kutıkuno. Alık uza de ki awe nêsımeno darinê we sonê. Zaf sonê, senık sonê rastê jü heni yenê. Alık yeno ke henide awe bısımo, Fatık'e oncia vana: - Alık, awa na heni mesıme. Na heni heniyê malepêskiyo. Alık damis nêdano, u heni de awe sımeno. Beno malopêsk gıneno ro ko sono. Fatıke, zaf ke sona senık sona rastê heniyê yena. A ki damis nêdana heni de awe sımena, oxroke na heni heniyê xatunu biyo. Fatıke awe sımena bena xatune. Serê heni ro jü qewaxe bena, Fatık'e vejina ro na qewaxe ser sona qılê qewaxe. Nejdiye heni de jü suke bena, sarê na suke golıgunê xo anê ke kurna na henide awe de. Sewlé Fatık'e dano awe ro golig xuye kenê, awe nêsımenê. Mılet xo sero niadano, Fatık'e gılé qewağe ravinenê. Kénê zele - mele sonê pasa ê suke ra vanê: - Pasa ala bi niade, çênêke vejia ro qewaxe ser. Jê asm u roze vêsena, sewlê çêneke dano awe de golige ma xuye kené awe nêsımenê.

Pasa mıleti keno top, eve torjenu ra yenê ke qawaxe bıbırnê. Soder ra hata sondı qawaxe sanené torjénu ver ke bıbırné. Bırnenê nêbırnenê ke qawaxe nêqedenenê. Beno tari, hencê qalağe ra maneno. Pasa vano: - Ca'verdê şime, meste yéme bırneme. Mılet darino we sonê. Alık'o ke biyo malopêsk yeno iştiriyê xo keno qawaxe ra oncia keno ra rast u duz oncia sono bırr. Roza bine soder oncia mılet yeno ke qawaxe bıbırnê. Niadané ke qawağe biya rast u duz. Sas béné! Oncia qawağe bırnenê ke waro dê. Soder ra hata sondı bırnenê tede base nêkenê. A suke de jü pirê bena, na Pire Pasayé suke ra vana: - Sıma ça honde zor danê xo? ez aê sımarê an war. Mılet oncino cerno ra soné suke. Roza bine Pire sona leê ane heni sero adır kena we ke rovar bıkero. Adır kena we, awe kena leê, leê ana voreşia adır kena. Eke dıdı-hire reê heni kena, Fatık'e qawaxe sera vana: -Xanıma mı, xatuna mı ça heni kena? Adırê xo sanena we? Adırê xo weke, kuçıkunê xo dormede rone leê xo pırê awe ke bia kuçıku serne. Pirê cerena ro Fatık'e vero, vana: - Çêna mına rındeke, ez qedayê to cenune, ez kor u kokımune........ xêrê merdunê xo bi mırê adır weke so. Fatık'e qewaxe ra yena bın ke Pire rê adır wekero, Pire dızdiya veng dana pasa é suke, pasa ve mordemuna yenê pê Fatık'e cené benê suke. Pasa, Fatık'e lazê xorê ceno çewres roze çewres sewe veyve kenê, Fatık'e lazê pasai rê kenê veyvıke sonê resenê mırodê xo. Rozê, laze pasai sono sayd, pire ve Fatık'e ra sonê rovar. Fatıke awe kena xoro. Pire çütir ke porê Fatık'e sanekena, haut pıncrari kena vıle Fatık'e de. Fatık'e bena mirçıke perena ra sona. Pire kıncunê Fatık'e kena pay sona çê pasai de nisena ro. Sonde lazé pasay sayd ra yeno niadano ke destê cinike qılaşiyê ra, çımê xo biyê gırs, rıyé xo permeliyo ro. Lazê pasai pire ra peskeno, vano: - Xanım, torê sebiyo nia? Pire vana: - Mı honde ke raa tora niado çımê mı biyê gırs. Mı honde ke axx - wahh kerdo bine kokım. Laze pasai ki inam keno xo xorê vano " belka raşt biya kokım. Lele de lazê pasay beno, na lele, lazê pasay rê werd/yemeg pozeno. Mırçıke yena nisena pençere bone çei ra wanena. Mirçıke yena ra zu(zon) lelé laze pasay ra perskena, vana: - Laze pasai ame, nêame? Dela cenemi gurete nêgurete? Lelé laze pasay na mirçıke gosdano, bınê werd (yemegi) vêseno. Roza bine oncia mirçıke yena nisena pençere ra qeseikena, lele oncia bınê yemegi vêsneno. Roza hireyine laze pasay lelé ra perskeno vano: - Lele, binê na yemegi ça vêsnena? Lele vano: - Hal-mesela nia, nia... mirçıkê yena nisena pençere ra mıde qeseykena vana:

" Lazê pasay ame, nêame. dela cenemi gurete, nêgurete? 

Aqle mı aê ser sono bınê yemegi vêseno. Lazê pasay vano: - Ala meste to ke yemeg pot ez ki yenune xo danu we, gosdan. Roza bine lele oncia yemeg pozeno, mirçıke yena nisena pençere ra wanena vana: - Lazê pasai ame nêame, dela cenemi gurete, nêgurete? Lele masa sure nano linga mirçıke ra, pê mirçıke ceno ano dano laze pasai. Laze pasai dest keno vılê mirçıke ra niadano ke girei tederê, pincraru pa vineno. Pincraru vıle mirçıke ra onceno niadano ke mirçıke biye ve çêneka ozeve. Henke rındeka, jé asme u roza uza vınete. Tabi çéneke rapa-ruta. Hortê awe ra vejiya. Pire vana: - wuy wuy, aê biarê sare bırbırnime. Ez legane anune aê sare bıbırnime gona daê hard merışiyo. Legane anê Fatık'e sarê bırnenê. Dılape goni gınena naka rıştıke ro. Nake, çê lazê pasai de gınena waro. Rozê jü pira bine yena çê laze pasay ré karkena zeru fina ta. A pire na naka riştıke vinena cena bena çé xo. Nake bena çê xode erzena pençerê xo. Pire herg roz yéna çê lazé pasay ré karkena. Sonde sona çê ke, çê fişto ta, yemeg poto, her çi hurenda xode ro. Pire sasbena! Roza biné pire peê çêver de xo dana we. Niadana ke naka rıştıke pençere ra gıne waro cıra çênekê vejiye, jê asm u roze vêsena. Pirê xıl bena pê çênêke cena, pire çéneke ra vana: - Meke cıgera mı, ça kuna naka rıştıke? torê guna niya? Fatık'e endi naka rıştıke nêkuna. Pire rozê sona çê laze pasai yena, vana: - Lazê pasa vano "bêrê mırê pırç bırıçuknê (eve sano çivor/taftır). Fatıke, vana: - Daê, tu ke şia lazê pasay ra vaze, çêneka mına féqire esta, a ki bêro toré pırç bıruçıkno. Pire sona lezê pasai ra vana. Lazê pasai vano, -bero. Roza bine, pire Fatık'e tey bena, piya pırç rıcuknenê. Lazê pasay u cinika xora ( pire) ki oda bine de( ronişte bené) nişte ro. Werté dı odu de pençere beno. Ciniki ve Fatıka pırç riçuknenê Fatıke, ciniku re hekatu qeseikena. Laze pasai qesune Fatık'e gosdano, vano: - Çêna pire, qeseibıke, qese to hem wuliye hem kulliye, qeseibıke. Pira ke biya cinia lazé pasay, heredina Fatık'e ra vana: - Fatik vengê xo bırrnena. Rozê oncia, Pire ve Fatık'a sonê çê lazê pasay. Lazê pasay ostorunê xo horte piru de barekeno,vano: - Na osterunê mı berê weyiye kerê. Usar kamij osteré ke çêver ra zere niame, o oster sencen ververde honde gıranena osteri zernu dan cı. Fatık'e laze pasay ra vana: - Kamij osterê to ke zaro ey bıde mı, ez ey ben kenune weyiye. Fatıke Ostoro zar cena ana çê.... Fatıke sane bena erzena zu oda tede was, mırzor téra beno, Toke ki erzena oda bine tede fike ve cev ra téra bené. Oster bena zere de giredana. Usar yeno, lazê pasay osterunê xo keno top. Ostero ke Fatık'e berdo, hen kerdo weyiye ke, hén biyo hewl ke, şemuge ra tever nino. Osteri bena dana lazê pasay. laze pasay oster senceno ververde honde kilo osteri zernu dano Fatık'e u Pire. Roze laze pasay çêneku ve ciniku keno top vano: - Bérê mırê nuku weçine. Hétéra ki sanıku vazê. Cinik u çênekê suke benê top sonê çê lazé pasay. Fatıka çêna pire ki tey sona. Hem nuku çinenê we, hem ki sanıku vanê. Fatıke sanıka xo qesey kena, vana: - Çênêkê vejiya ro ve qewaxe ser, saré suke çéneke vinenê, sonê xevere danê pasayé suke, pasa pire rusneno. Pire yena Çêneke xapnena qawaxe ra ana war péçéneké cené, çéneke cenê benê suke saraya pasay. Pasa, Çéneke lazê xoré ceno. çewrés roze u çewrés sewe veyve kenê. Roze pire ve çéneka soné rovar, çênêke awe kena xoro. Pire porê çêneke sane kena. Haut pincraru kena vılé çêneke de... Pira ke laze pasay gureto uza ra xilbena vana: - Vengê xo bıbırne, weseneku kena. Lazê pasay vano: - Çêna pire qeseibıke, qese to hem wuliyê hem kuliyê. Fatık'e vana: - Çêneke bena mirçıke perena ra ke şero! Pira cina laze pasay oncia vana: - Urze uzara def be....! Lazê pasay ciniyaa xora vano:

Vınde qesey bıkero.

Fatık'e vana: -Lelé lazé pasay yemeg pozeno, mirçıkê yena nisena pençere ra wanena, zaf wes wanena Lelê laze pasai mirçıke gosdano bınê yemegi vêsneno. Lele sono lazê pasai ra vano........ pê mırçıke cenê. Eve qesê pire mirçıke sare bırrnenê. Dılapê goni gınena naka rıştıke ro, naka rıştıke çê laze pasai de gınena waro. pirê yena çê laze pasai runa dê. Na naka rıştıke vinena bena erzena pençerê xo, çêneke naka rıştıke ra vejina bena çêna pire. A çêna pire ezune. Lazé pasay, endi her çi anora xo viri. Lazé pasai osteruné xo haut roz u haut sewe zere axure de giredano. vêsan u têsan verdano hora sole dano cı. Haut rozu ra tepia osteru ano Pira ciniya xo pa giredano osteru verdano ra. Oster tesanena xora nat u dota vozenê pire kenê pirtlei. Lazé pasay oncia Fatıke de zewejino sonê reseno mırodê xo. Vatoğe: Smaylıze ( Sağşeg ra Ayfer Aydın).

Caê vatene: Berlin
Tarıx: 1985 Na sanıke Désım de qesey bena.
Qeydkerde :Tekin Yıldırım 

Qeso qız: Sanıka Alık u Fatıka Pêserokê AYRE’ İ, Amor / Moré 13, serra 1987 de vejay bi, Ayre de na sanike kêm u xelet vejijay bi. Na sanıke kıtave mıno vırende ‘ALIK U FATIKA’ (1994 Berlin'de mı ve xo çapkerd bi) de pelga 29 -33 de nuşay bi. Coka mı na sanıke reyna çım ver ra viyarné ra. Newende nuste / nivisné.