Vaten:Koyo Berz/Dısmalı nımıtenı

Wikipediya ra ensiklopediya xosere
Xıl de be pusula Xıl de cıgeyrayışi

Na kay mabêndê qeçkandê panc seran ra tepêşı heta ê des-dıwês seran kay bena. (Wext beno xorti zi na kay kaykenê). Jew zanaye yan zi Mısnayox (Mahlim) qeçekê kı do kay kerê ê qeçkan cayê dı arêkeno pêser. Hewna kı dest bı kayda xo nêkerdo, kay inan rê dano izahkerdenı u inan jew bı jewi zey dairiya, zey qasnaxdê pırojına pê kışta, bêmabên dano ronıştenı. Dısmalê zey goşandê Arwêşiya gırêdano, qeçkan ra jewi cadê cı ra werzaneno u a dısmalı dano ey dest. (Wexto kı cadê xo ra werzeno cay cı veng maneno, kes nêşıno cadê cı dı nêroşeno. Gorey kay zi vanê o ca veng bımano u kes nêşıro o ca dı nêroşo). O kı dısmalı kerda xo dest, o xo keno çewt u qeçkan pey ra çend fıni bıvazdayena, bı lez u beza, geyreno, çerx beno, turanê xo erzeno u cı pey ra doş beno. (Tabi wexto kı geyreno, dısmalı cı destı, destê cı cı verdı, peydê qeçkan ra vazdano. Qeçeki destanê cı nêvinenê ka dısmala hewna cı destı yan zi jewi pey dı vıradaya) A geyrayenı dı, a vazdayenı u tur eştenı dı dısmala destê xo jewi pey dı ronano u bı lez u beza vazdano şıno ê cadê xo yê vengi dı roşeno. Wexto kı a dısmalı vıradano jewi pey, o kı dısmalı cı pey dı vıradeyaya, eger o bızano yan zi bıvino, beno a dısmalı ro u kewno o kı dısmalı cı pey dı verdaya ey dımı. Hetan kı o cadê xo nêresoyo u nêronışto, no xo ey resno yan zi ey tepêşo, hım qalêda xo keno ey o, hım pereno goşdê ey u ey fınê-dıfıni ê qeçkan pey ra çarneno u hım zi a dısmalı fına pey dı dano ey u o fına kaya xo rameno, qeçkan pey ra doşbeno.

Hetan kı a dısmalı jewi pey dı nêverdo u xo cadê xo nêresno u nêroşo, tım o do ê qeçkan pey ra doşiser doş bo. Wexto kı xo cadê xo resno u roşo, no fın o kı dısmalı cı pey dı verdaya, o a dısmalı gêno u ê qeçkan pey ra çerx beno. O zi bı lez u beza, bı çapıkey u çımakerdeneya wazeno a dısmalı jewi pey dı verdo u xo ay ra bıreyno, pak kero u şıro cadê xo dı roşo. Eger o kı dısmalı cı pey dı roneyaya, o a dısmalı nêgiro u nêşıro xo o kı a dısmalı cı pey dı ronaya ey resno, o a dısmalı gêno u ê qeçkan pey ra çerx beno. Bı no hesaba, bı çerxbiyayena, xeylê seati na kay wına ramena. Xeylê wextê xo qeçeki bı na kaya pırr kenê u zahf na kay ra hes kenê. Wexto kı jew dısmalı jewi pey dı vıradano u o nêvineno, qeçeki hüwatan ra kenê bıteqê, piq-piq pê hüwenê u bı hüwateyê do weşa a kay ramenê. Kes qelbê kesi nêşıkneno, kes kesi nêqahrıneno. Heme zey bırayana pê dı kay kenê. Nê kay delilê Demokratbiyayenda ma yê. Nefes u ülqê ma hend hera bı, hend hera bı hed u hesabê cı çınêbı. Şewra ra heta şan, şan ra heta şewra ma piya kay kerdê, rojê ma qelbê pê nêşıkıtê, pê nêtewnayê u nêqahrınayê. Jew, yan zi kesê kı pê ra qahrıyayê zi hıma ma kewtê mabên, zeriya cı gırotê u ê ardê umışê pê kerdê. Ma nêverdayê enbazê enbazê ra bıqahriyo. Goreyo kı ewro hend dınya ravey şiyo, zey ê rojandê ma yê verênan ma yê nêşenê piya bıkerê u wextê xo pê hetı pırr kerê u ravêrnê.



Kay Kay u Wextravêrdene

Bırı  • Cırit  • Çeq  • Çımpıstıkı  • Çıtme eştenı  • Dahfı  • Delame  • Delo  • Derabul  • Dısmalı nımıtenı  • Dısmalı remnayenı  • Eskıjekı  • Gogı  • Govendı  • Gozçal  • Güle  • Hakmêş  • Hakçıq  • Herek  • Hirê lıngı  • Hêlıkı  • Kapok  • Kelasingı eştenı  • La eştenı  • Pere nımıtenı  • Pıst  • Qelanqizık  • Roverdıkı  • Salgoz  • Serê Serı  • Siya nişani eştenı  • Siya qüweti eştenı  • Tazi u Arwêş  • Tir u Tirküvan  • Tul  • Têmane  • Verg u Şıwane  • Veyvekı  • Yazı-Türe  • Zewcı-Ferı