Vaten:Koyo Berz/Güle

Wikipediya ra ensiklopediya xosere
Xıl de be pusula Xıl de cıgeyrayışi

Na kay qeçkan ra tepêşı heta ê gırdan, heme xo miyan dı na kay kaykenê. Güle veri siyan ra vıraştê. (Tabi güleyê kı siyandê çaqmaqi ra vıraştê, rew rewi nêşıkyayê. Labırê güleyo kı ameyê a cı ê güley şıkıtê. Kay dı güleyo kı bışıkıyayê kêsedê wêrdê cı ra şiyê). Tabi bê siyan zi tay merdıman qerşun ra zi güley vıraştê. Veri qerşun heleynayê u vıradayê qabêdê zey güliya topıni miyan u cemıdnayê. O qerşun dı ê qabi miyan dı cemıdıyayê u biyê güle. Tabi bahdo Fabriqey vırazıyay u ewro nê güley nê fabriqan dı, bı çimento ra, siyan ra, asın ra, cam ra u zewbi çi u madenan ra vırazênê. Qandê gülekerdenı şêlıg arêbıyayê pêser u şiyê teberdê dewı yan zi mahla dı, meydanê do duzo bêsiyın dı xo rê cay gülekerdenı vıraştê u tey kay kerdê. (Cay gülekerdenı estibi kı, herwext şêlıg tım şiyê u ê cayan dı güle kaykerdê). Güle hım peran ser u hım zi zewbi çi ser kaybiyê. Tabi en bolki pere u gülan sero güle kay biyê.

Ê kı kenê güle kaykerê, hergı jew beno rêzêna, metroyonim yan zi dımetroy mabêna tekanê xo ronanê. (Eger peran ser kaykenê, perey xo ronano, eger jewbi çiyan ser kaykenê se, herunda cı dı pulê, pereyê, qırmê, camê yan zi çiyo zey inano kı weş aseno ronayê. Jew-jew wext Goz, Vamı yan zi porteqalan ser kaykerdê. Herunda tekan dı ê ronayê.

Tekê xo ronay tepeya hirêmetroy tekan ra duri, xo rê cay tekan eştenı vırazenê. (Tabi cayo kı vırazenê seredê tekan dı beno u heme teken zey rêzıla keno hızayê miyan. Ê kı kenê kay kerê peşkı çekenê, ka kam do veri kay kero u kam do ey dımı. Bı no hesaba cay xo peşkı dı kerd beli tepey a dest bı kayda xo kenê. Wexto kı nê dest bı kay kenê, o kı bahdo biro kay kero o şıno en peyni) Ê kı kay kenê pê dımı kewnê rêz. O sıfteyên vano "Teki u güley heme têmıyan u güley xo erzeno tekan. Çend tekan ro güno ê tekan erd ra hewadano keno xo dest. Ey dımı o bin zey ey vano u güley xo erzeno. Ê ey zi tekan ro güno tekan, eger güledê ê bini ro zi güno, ê tekê kı ey werdi bi ê tekan zi ey ra gêno u o veşeno. Bı no hesaba pê dımı, pê dımı gülanê xo erzenê tek u gülan. O kı çend teki werdê o bin güledê ey ro do ê tekan ey ra weno. Hemını güley xo eşt tepey a, en bahdoyên wexto kı güley xo erzeno, güley cı tekê ro yan zi güleyê ro güno, o fına erzeno ê tekandê binan yan zi güleyan. (Tabi kamcinı cı ra nezdi bo u bızano do pıro do erzeno ay yan zi ey). Kay miyan dı jew çend çiyan ro do hendı zi pê dımı kay keno. Wexto kı derba xo erzeno u derba cı veng şına, no fın o kı ey dımı yeno o derba xo erzeno. Hetan kı tekêda cı ro nêgüneyayê bımano, nê kay kenê u bı gülana pê fetılnenê. Wext beno jew xeylê tekan weno, no fın kay ra kewno duri kı, kes nêşo güledê cı ro do u tekan cı ra buro. O kı tay teki werdê wext beno o şeno a teka kı menda ay ro do, labırê nêdano pıro kı, ê bini biyaro fırsend u ey ro do kı, ê tekan ey ra bıgiro. Wexto kı güneno heme tekan ro u teki heme qedıyênê, no fın fına hergı jew tekanê xo ronano u kewnê rêzdê xo, qandê kayda binı. Tekê xo ronay tepey a dest bı kayda dıdını kenê. Bı no hesab a şewra ra hetan şan, banan peydı, rayan sero, meydanandê duz u vengan dı güle kay kenê u wextê xo ravêrnenê. Wext beno o kı bol perey weno, bahdê kaykerdenı dı peranê enbazandê xo pey dı dano. Labırê tay zi pereyo kı werdo pey dı nêdanê. (Tabi heqê kesi zi çıniyo vazo pey dı bıdı. Bı xo bıdo dano, nêdo nêdano).

Tabi vanê ma nay zi beli kerê, güle hım bı gıştana, erd ra eştena kay beno u hım zi pay ra bı destana eştena kay beno. Wexto kı pay ra destana kay bo, vanê mabênê tekan di-rê metroy bo u cay eştenı zi en kemi çıhar metro bo.

Güle bê teki ronayena zi kay beno. Mesela dı enbazi xo miyan dı güle pê eştena, pê bı gülana fetılnayena zi güle kay kenê. Tay zi bı Gozana, Gozi pê eştena, bı Porteqalana. Porteqali pê eştena zi güle kaykenê. Kam ê kê ro do o ê ey cı ra gêno.



Kay Kay u Wextravêrdene

Bırı  • Cırit  • Çeq  • Çımpıstıkı  • Çıtme eştenı  • Dahfı  • Delame  • Delo  • Derabul  • Dısmalı nımıtenı  • Dısmalı remnayenı  • Eskıjekı  • Gogı  • Govendı  • Gozçal  • Güle  • Hakmêş  • Hakçıq  • Herek  • Hirê lıngı  • Hêlıkı  • Kapok  • Kelasingı eştenı  • La eştenı  • Pere nımıtenı  • Pıst  • Qelanqizık  • Roverdıkı  • Salgoz  • Serê Serı  • Siya nişani eştenı  • Siya qüweti eştenı  • Tazi u Arwêş  • Tir u Tirküvan  • Tul  • Têmane  • Verg u Şıwane  • Veyvekı  • Yazı-Türe  • Zewcı-Ferı