Vaten:Koyo Berz/Kay u Wext Ravêrdenı

Wikipediya ra ensiklopediya xosere
Xıl de pusula Xıl de cıgeyrayışi

Kay u Wext Ravêrdenı (Raviyernaêne) dı no koşedê dı ez wazena hebê bahsê kayandê ma yê welati u xo miyan dı kaykerdenda inan bıkera. Wextê xo dı, wextê qeçkinda xo dı ma welatê xo dı kayê bol weşi kaykerdê u wextê xo yo veng bı ê kayana kerdê pırr u ravêrnayê. Zey ewroy Televizyon yan zi hendayê qanalê televizyonan çınêbi. Ê kay parçeyêdê gan u Kültürdê ma bi. Labırê ewro ê yê wertera werzenê u vera vınibiyayena ray gênê u şınê. Eger ma nêşê ewro inan kaykerê zi, ravêrnê heyat zi, vanê ma nêverdê ê vıni bê u wertera werzê. Qandê vıninêbıyayenı çendınanê cı ma zanê u çendê cı yeno virdê ma vanê ma inan bınuşnê u ravêrnê qaxıdi ser, ravêrnê pêserok u kıtabandê xo yê Dımıli kı, ê dıha vıni nêbê, wertera nêwerzê u vira nêşırê.

Ez bı xo wazena kı ê kayandê ma ra çendê cı u çend yenê mı viri bınuşna u pêserokê şıma yê Kormışkani dı bıweşeyna. Qandê kı, nesılê ma yo kı ê nêdiyê, ê niyaşnawıtê, ê kaynêkerdê u nêzanê seninê, ê bıwanê u pey bızanê. Yanê nesilê ma yo kı newe reseno, ê zi inan bısınasnê, beno wext beno ê zi zey gırdandê xo ê kayan kaykenê. Qandê vıninêbıyayenı u viriardenı vanê ma nê çi ser o vınderê u bınuşnê. Şıma şardê ma ra, wendoxandê Kormışkani ra recay mı a ya kı, şıma zi çıçi zanê, çend zanê u çendê cı yenê şıma viri bınuşnê u ma rê bırışê. Metersê u mevazê ya ma şaş bınuşnê. Şıma şaş bınuşnê zi jew do werzo u raştê cı bınuşno. Tay merdımê ma estê zahf çi zanê, labırê qandê nuşnayenı xo dı ê cesareti nêvinenê. Halbu ki ê ma rê çımey Kültür, edet, tore u folklordê ma yê, labırê çı heyf nêwetanê bıvıziyê piyase u bınuşnê. Inan ra reca u waştena ma wa bıvıziyê piyase u folklordê ma rê rayberey bıkerê. Bewnirê ez o seni, şaş raşt, vêşi, kemi u herwına çiyê şardê xo bêters, bêxof u bu!

Exem nuşnena vanê şıma zi bınuşnê. Şıma zanê ez marda xo ra nuştox niyamebiya dınya u ewro zi nuştox niya. O kı ez kerda nuştox cesaretê mın ê nuşnayeno. Mı xo dı cesaretê nuşnayenı bı ca kerdo u ez o bêters şına cı ser. Ez zana şıma dı mın ra des-vist qati vêşêri o cesaret u a zanayey esta, labırê şıma bı xo hewna o xo miyan dı kefş nêkerdo u nêşiyê ê nokti ser. Hebê xo bılunê, cadê xo ra werzê yan zi holbê xo ser u ê cewherê miyandê xo vejê teber u rafinê çıman ver. Hedefandê Kormışkani ra jew zi şıma rê ray akerdenı u cesaret dayena. Cayo kı şıma cesaret nêkenê tey bınuşnê, bêrê Kormışkan dı bınuşnê. Kormışkan ê ma nê ê şıma yo.

Vanê şıma nay rınd bızanê, eger o çiyê ma niro nuşnayenı, ewro ya meştı o do vira şıro u zey çiyandê ma yê binan a tarixi miyan dı bıfetısiyo, bıheleyo u pede şıro. (Heme serehewadayenê ma wıni nêbiyê, Ka serehewadayenê Dımıliyan, qe tarix dı namey cı ravêreno?) Demo kı kes nê çiyanê xo bınuşno u ravêrno qaxıdan ser, o wext ê ma rê mal benê u manenê. Zahf çiyê ma şari xo rê nuşnayo, ewro inan ser o yeno hesıbnayenı. Labırê ma zey inan nêkenê, ma teniya çiyê xo xo ser o nuşnenê. Ewro nê meştı, beno mıriçıkı siro güno, welatê ma azad u bıxoserbo. O wext no çiyê ma do newe ra bıvıziyo u piyase kewo. Ewro çend nirê kaykerdenı zi, beno rojê biro, imkan ma u şardê ma dest kewo, ma heme tewrdê qeç u quldê xo ya, way u bırayandê xo ya, dost u enbazandê xo ya piya agey rê herda bawkalandê xo ser u heme piya ca bı ca, suk bı sukı, dewı bı dewı ê kayanê xo kaykerê. Demê kaykerdena ê kayan dı gırdanê xo, şehidanê xo, xoverdayenê xo biyarê xo viri. Ê kay zi wextê xo dı bibi parçeyêdê k! ültürdê ma u kewtibi heyatê ma miyan. Wextê xo yo veng ma bı ê kayana ravêrnayê u sebrê xo pa ardê. Ê kay biyê semedê ma yê pêsınasnayenı, pêseramyayenı, pêvinayenı, pê dı enbazeykerdenı, pêhesıbnayenı, piya hereketkerdenı, pê rê wıhêrvıjyayenı u qimet pêdayenı.

Wexto kı jew cayê ra newe ameyê cana u wıja dı ca biyê. Bı sayedê ê kayana ma pêsınasnayê u biyê enbazê pê. Ê kaykerdenan dı ma xo rê enbazo rınd u saxlem weçinayê. Ê kaykerdenan dı ma qerekter u ahlaqê pê fahm kerdê. Ê kayan bol ray vıstê ma ver u bol ray ma verdı akerdê. Semedê ê kayan ra şermi ma yê miyandê şêlıgi (cemeeti) ravêrdê u bêters ma ameyê şêlıgi miyan dı gırdandê xo hetı ronıştê u goştarey a mesele, estanık, qeybet, edet, tore, folklor u zıwandê xo kerdê u inan ra zahf çi mısayê. Ê kayan ra ju zi bırı bi.

Nuştoğ: Koyo Berz

Kayi[çımey bıvurnê]


[[Kategoriye:Zagon]]