Vaten:Koyo Berz/Pere nımıtenı

Wikipediya ra ensiklopediya xosere
Xıl de pusula Xıl de cıgeyrayışi

Pere nımıtenı: Na kay zi qeçkan miyan dı kay bena. Jew do pil, resaye u mısnayox qeçkanê dewı yan zi ê mahlayê komê pêser keno, qandê kaykerdenda na kay. Heme arêkerdi pêser tepey a xo tunıkı ra pereyê do asınên vejeno u nê qeçkan rê vano: "Qeçkêno, bewnirê ez do nê peri bera cayê dı bınımna, o kı nê peri bıvino no pere do ê ey bo". Kaykerdena na kay zahf weşdê qeçkandê qıj u pilan şına. Çımkı do xo rê hım kay kaykerê u hım zi kê o pere di do ê peri xo rê bıgirê. Yanê kam ê peri bıvino o pere do ê ey bo.

Perey mısna qeçkan tepey a qeçkan rê vano: "Qeçkêno, şıma heme bı destandê xo ya çımanê xo bıgirê kı, ez bera nê peri bınımna". Qeçeki pê ro bı destandê xo ya çımanê xo gênê. No ê peri gêno beno cayê do beli dı nımneno. Nımıt tepey a yeno qeçkan rê vano: "Qeçkêno mı o pere berd fılan cadı nımıt, çımanê xo akerê u hadrê ma şırê bıgeyrê u ey bıvinê" (Tabi cayo kı nımneno nişanê ê cay qeçkan rê vano, mesela mı berd fılan meydan dı, fılan bostan dı, fılan daran bın dı, fılan rezi miyan dı kerd mewê bın yan zi herwına. Tabi o zi ê peri gêno beno meydanê do hera dı yan zi cayê dı nımneno kı, qeçeki vêşi nêbetıliyê u ey bıvinê. Qeçeki heme çımanê xo akenê u bı vazdayena, bı lez u beza şınê o cadı geyrenê ê peri. Tabi fına sıfteyênı ê peri cayê do rıhatı nımneno kı, qeçeki ey rew bıvinê kı, pa şabê u kêfê cı pa biro. Ê fınandê binan cado dıha zor dı nımneno kı pa wextê xo ravêrnê u kay kerê.

Wexto kı qeçê yan zi ê qeçeki ê peri vinenê, no fın no jewna peri mısneno ê qeçkan u ey zi gêno beno nımneno. Tabi ney zey ê bini cayo kı rew bıvinê dı nênımneno. O zi di tepey a jewnay, jewnay u bı no hesaba çend seati inan rê kay keno hadre u wextê inan dano ravêrdenı. Tabi nê peran zi may u piyê ê qeçkan, Xal u Dedê (Apê) ê qeçkan, Mıxtarê dewı, veramyayey, Beg u Axlerê inan danê. Ê kı ê peran vinenê, ê zi ê peran gênê u şınê Etar, Çerçi yan zi Dukandaran ser u pa şeker u çiyo wına herinenê. Wexto kı perey cı kemi bê yan zi bol perey nêdibê, serê cı o merdım o kı a kay inan a dano kaykerdenı, o keno temam. Bı no hesaba qeçeki hım kaya xo kay kenê u hım zi bahdê kay şekerê xo herinenê u wenê. Wexto kı qeçeki bı ê perana şeker yan zi çi herinenê, heme zey bırayana pê ra kenê vılla. Kes kesi vêşêri nêgêno. Na zi merdımey u pê ra heskerdena ma u pê rê qimet dayena ma nişan dana. Wexto kı şaranê binan qeçê xo kıştê ma qedır u qimet dayê qeçandê xo u inan a piya kay kaykerdê.



Kay Kay u Wextravêrdene

Bırı  • Cırit  • Çeq  • Çımpıstıkı  • Çıtme eştenı  • Dahfı  • Delame  • Delo  • Derabul  • Dısmalı nımıtenı  • Dısmalı remnayenı  • Eskıjekı  • Gogı  • Govendı  • Gozçal  • Güle  • Hakmêş  • Hakçıq  • Herek  • Hirê lıngı  • Hêlıkı  • Kapok  • Kelasingı eştenı  • La eştenı  • Pere nımıtenı  • Pıst  • Qelanqizık  • Roverdıkı  • Salgoz  • Serê Serı  • Siya nişani eştenı  • Siya qüweti eştenı  • Tazi u Arwêş  • Tir u Tirküvan  • Tul  • Têmane  • Verg u Şıwane  • Veyvekı  • Yazı-Türe  • Zewcı-Ferı