C. M. Jacobson
| C. M. Jacobson | |
|---|---|
| Melumato şexsi | |
| Cınsiyet | Camêrd |
| Hempar | M. Sandonato |
C. M. Jacobson, Zazayan miyan de cı ra Bıra Mıkail ki vanê, zıwanşınasê do Amerikayıco Bostonıco. Be gruba pêseroka Wareyi ra piya mucıdê Alfabeyê Zazakiyo ke nuştoğê Zazakiyê ke raya Piya û Wareyi ra yenê, gureynenê. Jacobson be xanıma xoya zıwanşınase M. Sandonatoe ra piya serranê 1992 (?) - 2003ıne de sûka Rüsselsheimi de Dêsımıcan miyan de mendi, Zazaki musay. Ê hurdımêna Amerika (DAY) ra ameyi biy ke zıwananê bındestan sero bıgureyê, xo rê Zazaki çinıto we.
Vıraştena Alfabeyê Zazaki û nuştekaranê Zazayan ra piya gurenayış (xebat)
[bıvurne | çımeyi bıvurne]İnan be nuştekaranê pêseroka Wareyi ra piya inan serre de dı rey seminerê zıwani day. Nê semineran de inan tım be Zazaki qısey kerdêne. Oyo ke vengan sero ki xebetiyay, inan qıseykerdoğan ra ki qeydê vengi gırewtê ke seba pêserardena alfabeyê vengan analiz kerê. Nê xebatan ra kıtabê cıyo verên Rastnustena Zonê Ma be Zazaki û Almanki (Verlag für Kultur und Wissenschaft, Bonn) serra 1993yıne de veciya, qeyde û qanunê imla nê kıtabi de day arê. No kıtab her çıqa ke fekê Gola Dêsımi esas gêno, merdum pê şeno Zazakiyê zımeyi ra fekanê binan de ki bınusno. Çapê nê kıtabiyê dıyıne ki Estamol de, Vejiyayişê Tiji de veciya.
"Zazaca Okuma Yazma El Kitabı"
[bıvurne | çımeyi bıvurne]No kıtabo ke be Tırki veciya, kıtabê mocnayışê (banderkerdışê) zıwanê Zazakiyê nuştışiyo, dı letan ra yeno pêser. Leteyo yew Zazakiyê Zımeyi rê (gıraniye be Gola Dêsımi), leteyo bin ki Zazakiyê Veroci (Sêwrege, Çêrmuge, Aldûş) rê abırrnayeyo. Kıtab be nameyê "Zazaca Okuma Yazma El Kitabı" (Kıtabê Zazakiyê wendış û nuştışiyê desti, Verlag für Kultur und Wissenschaft,Bonn) serra 1997ıne de veciya. Nê Kıtabi sero 3 serri anciya be nuştoğanê Zazaki ra piya gureyay. Tenya êyê ke Zazaki de wahêrê tercıbeyi biy nê, hele ke êyê ke xamê nuştışê Zazaki biy, fıkr û lomê inan ki gırewti verê çımi.
Çarnayışê filmê weşiya İsayi
[bıvurne | çımeyi bıvurne]C. M. Jacobsoni anciya be tayê nuştoğan û qıseykerdoğanê Zazaki ra piya dest da projeyê çarnayışê filmê weşiya İsa Peyğamberi. No film belki çarnayo 180 zıwanan. Film be Zazakiyê Zımeyi, gıraniye be Zazakiyê Dêsımi (Kırmancki) VCD de veciya.
Enstitüyê Zazaki Frankfurt
[bıvurne | çımeyi bıvurne]Jacobson be xanıma xo M. Sandonatoe ra piya ezayanê ronayoğanê Enstitüyê Zazaki Frankfurti de ca gênê.
Ageyrayış
[bıvurne | çımeyi bıvurne]Serra 2003yıne de o be xanıma xo ra piya anciya geyray a welatê xo Amerikaya Zımeyi, be Boston.
Bibliyograyfa
[bıvurne | çımeyi bıvurne]- Raştnuştena Zonê Ma (1993, 1997)
- Zazaca Okuma Yazma El Kitabı (1997)
Meqaleyi
[bıvurne | çımeyi bıvurne]- Herfê Gırêdayişi Y u W (Ware, Amarê 12.)
- Jacobson, C.M. / M. Sandonato 1997: Zazaki se beno? ([Tija Sodıri – Perloda Zon u Zagonê Kırmanc-Zazay, 4. Sayı, s. 9-12. Frankfurt|Tija Sodıri])