Dogo Argentino

Wikipediya, ensiklopediya xosere ra
Dogo Argentino
Şınasnayış
Taksonomiye
Familya Argentine dogo

Dogo Argentino (ya zi tenya Dogo, Mastifê Arcantini) kutıkê do gırdo, quwetıno, baqılo, atletiko, sıpêyo ke merdıman o 1928Arcantin dı vıraşto. Merdıman tayê cınsê kutıkan (9 cınsê kutıkan) kerdê têmiyan, wıni zi Dogo Argentino veto miyan. Dogo Argentino xozan zaf hewl seyd keno, key merdımi hewyananê gırdi seyd kenê Dogo Argentinoy gırweynenê u o peşti dano merdıman.

No kutık xeylê baqılo, nêtersıno u kaykerdışi sineno. O keyê xo ra zaf bestiyeno, yani wayir u nezdiyanê wayirê xo zaf sineno. O tım wazeno ke merdımi ey ra hes kero, bılewno, vırar kero, qıcan sineno, ğeriban ra şeno ğalım kero, kutık u heywananê binan ra hes nêkeno. Polis u eskeran ra peşti dano u karê cıgeyrayış u fetılnayışi zaf hewl keno.

Tarixê cı[bıvurne | çımeyi bıvurne]

Wıni qebul beno ke Dr. Antonio Nores Martinezi no kutık vıraşto, aferno. Fêl u emelê Martinezi o biyo ke yew kutı vırazo ke o hem Xozan u Puma (Şêrê Koy) seyd kero, inan pey ra şêro, bıgêro u biyaro. Ey raver Kutıê Cordobay Pırodayışi (Perro Pelea Cordobes), ewro no kutık çıniyo, ra dest pêkerdo. No kutı zaf quwetın u gırd biyo ema nêşayo boye kero u kutıkanê binan ra piya nêşiyêne. Coka zi nêşayo seyd bıkero. Dr. Martinez xeylê serran miyan dı, no ırq be ırqanê binan kerdo têmiyan, u ani-wıni Dogo Argentino vıraşto, aferno.

Ey sero[bıvurne | çımeyi bıvurne]

Her çi ra raver no kutık kutıkê do seydkerdoğo. Coka zi gani raver enê emeli rê bêro bıgırweynayış. O petbiyayışi rê rınd niyo. No kutık tabii niyo, xeylê kutıki bini biy têmiyan u wıni veciyo miyan, coka xo sero tayê qusırê genetiki kırışeno. Pigmentê melaninê ey kemiyo, coka zi populasyonê cı ra %20 problemê eşnawıtışi cıwiyeno. No kutık iklımanê zaf serd u zaf germi rê rınd niyo, zaf quwetıno u karakterê cı zaf weş u waro coka gani ke wayirê ey zi hetê fiziki ra quwetın bo. Muyê cı kılmê, coka problem nêvırazeno. Postıkê ey hesaso, coka goştê kerge u nanwerê bini şeno alerji bımotno. Merdıman sineno, ema kutık u heywananê binan ra hes nêkeno, nêsineno. No kutık quweta xo ra u leze bes nêvano, coka zi pırodayışê kutıkan de gırweyniyayo u hewna zi gırweyniyeno. Riyê nê sebebi ra eger merdım wazeno ke wayirê yew Dogo Argentinoy bo, gani ke Federasyonê Irqanê Kutıkan ra ey bıgêro, tesdiqê ey lazımo.