Fast food

Wikipediya ra ensiklopediya xosere
Jump to navigation Jump to search
Hambuger fast foodan miyan de xeylê namdaro

Fast food zıwanê ma de beno rew werdış, namê werdanê ke bufe u restoranan de pewciyenê u uca de weriyenê. Êndi gelê doktor u diyetisyeni qebulkenê ke fast food insanan tehdit keno. Fast food waxto modern de kewt kulindanê dınya. Merdumo modern bêwaxt bi, her çi ebe teqeze resnênê ta, werdena xorê ki zaf waxt nêmendêne. Seba nae ra ki fast food icat bi; manê fast foodi uyo ke insan hama lıngan ser çiyê erzeno ta û şono raa xo ra. Vırêndiya konseptê fast foodi zaf bereqiyêne. Her kesi cat kerdêne ke fast food buro. Fast food serê hardi ra bibi sembolê modernêni. Mc Donald's kamci welat de rabiyêne, verê çêveri de mılet biyênê rêze ke zerre kuyo.

Fast foodê Çinıcan: lamian

Feqet dirê serran ra tepiya her kesi di ke no sembolê de puço. O taw êndi nêweşiyê ke fast food ra bınge cênê ki vejiyay werte, şewlê fast foodi pıra pıra şayiya. Roca ewroêne de êndi her kes zano ke fast food sembolê kapitalizmiyo. Ewro êndi eke welatê de dınya de protestoê bıbo, protestoci êrış benê caanê fast foodi ser. Wertê fast foodi de en zaf hamburger êno rotene. Werdoğê hamburgeri zaferi ki doman û xortê. Feqet hamburger çıqa mırd kero, hondê ki keno nêweş.

Zerarê hamburgeri zafêri reseno domanan. Xora domanê nıkay ne mali çıraynenê ne ki tevera kaykenê! Domani zaferi caê xo de ronişteyê, ya atari kaykenê ya ki têlevizyon sêr kenê. Na bêhereketêni xora inan kena xurt; eke hamburgeran burê serhev benê qelew, bêhemd benê xurt.

McDonald’s bazarê fast foodi de marketo gırdo

Fast foodi, hem ebe çiyê zerrê xo hem ebe qêydê potena xo hemı ki ebe ambalajanê xo gelê nêweşiya finê kar. Goştê hamburgeran pırê hormonan û antibiyotikano; nonê hamburgeran, seba ka rew kartû nêbo, pırê kimyasalano; cao ke hamburgeran tede pocenê teqeze ra rınd pak nêbeno, uca bakteriy kunê kar; çawo ke hamburgeran ebe tirica mikro-pêle kenê germın, xêlê kimyasalê newey kunê kar. Nê ki pêro piya ebe werdena hamburgeran derbazê ma benê. Welhasıl werdena hamburgeran gelê nêweşiyan silayi kena; riskê qanseri, alerji, xıtimiyayêna thamara, kolesterol, qelb, şekır, hêrsınêni, tansiyono berz. Hamburger teyna nino werdene, zafêteney hamburgeri de kola û çiyo karbonatın şımenê; ebe o qeyde wucıdê xo de kalsiyum kenê şenık, no ki beno sebebê nêweşiyanê astıkan. Gorê nıvıstê psikologê de Amêrikanıci, domanê ke şonê restorananê fast foodi, bêhemd benê nêweş, bêhewn manenê û hewnanê tersınan vinenê. Gere domani werdena hamburgeran ra bışevekiyê.