Pasor (be Usmanıcki: پاصور) ya zi Pasur ya zi be nameo bin Qulp (be Usmanıcki: قولب, be Tırki: Kulp) jû qezay wılayetê Diyarbekırio. Caê xo zımey wılayetê Diyarbekıri dero.
Hetê zımey rocakewtene de Diyarbekıri ra qasê 122 km dûrio. Tam zımey Sılivani de, rocakewtena (rocvetışê) Lıcêy dero. Merkezê Pasori de 4 mehley (taği) estê. Dewê Pasori zi 51 hebe sey muxtari u 134 hebi zi sey mezra hesebiyenê. Dewê ke sey muxtari hesebiyenê, cı ra 11 hebe Zazaki, 37 hebi zi Kurdki (Kırdaski, 3 dewi zi hem Kurdki, hem Zazaki qısey kenê. Mezrê Pasori zi hem Zazaki, hem Kurdki xeberi danê, labelê tesbit nêbiyo ke çend mezrey senên zıwan qali kenê. Nê 51 dewan ra Cıxsê (Ağaçlı), Şêx Hemza (Hamzalı) u Mehmedka (Aygün) nahiyaê.
