Zazakipediya:Vergo vêsan

Wikipediya ra ensiklopediya xosere
Xıl de be pusula Xıl de cıgeyrayışi
Verg

VERGO VÊSAN

Rozê, verg bi vêsan, kut ‘ra rae. Nata fetêliya, bota çerêxiya, zaf qefeliya. Rastê saydê nêame, hêrs bi, qariya. Teseliya xo ke kute, xo pêyser sana rae. Waxto ke racêro, çımê xo gına ra miya şiaye. Xo est peyê bırri, ververê vae Jü xılê de ame lewê miya şiaye. Vake: »Düri şiune nejdi amune, Rastê saydê xuyê wêşi bine! Gere ke ez to nıka xorê burine!«

Miye zona ke verg amo ke ae buro, Xo-xode vake, ›Aqıl, aqıli ra coro! vınde hala na verg mırê se keno!‹

Verg xıl bi ke pıro bo, Miye veng fiştra xo: »Bıra verg! To ve vengê xuyo wes a serre, vatêne marê lawıka miya qerre. A lawıke vaze, xorê reyna goşti! Va gon u goştê mıro to helal bo, wena xorê mı oncia bure!« Se ke hesna vergi goynayisê vengê xo, vake, ›naerê vaji jü lawıka de xo!‹

Vılê xo kerd avoro, vake: »Wuu! wuu! wuu wuuu!«

Reê dırey ke dekernê lawıka xo, Xafılde vêjiay lewede kutıkê dewu. Na 'ra vergi ser, perna berd peyê kou. Verg tekıt şi kot qurnê xo. Tenê ke tersê xo rema, vêjiya tever, feteliya reyna. Waxto ke teqete ra bıkuyo, rastê jü qatıra de lenge bi, vake, ›buri xorê na qatıre tek-teyna!‹

Qatıre niada ke verg hao dota yeno, vake: »Bıra verg! Tı werdenerê mı wena hama, eke ke bıoncê na mıxê lınga mı, torê dayna beno helal gon u goştê mı!«

Verg vêsaniye ra nêzona ke se bıkero, vake, ›bıonci mıxê lınga qatıre hervina, buri xorê rehet goştê na qatıre teyna!‹

Bi ve mıxê lınga qatıre ro ke bıonco, Qatıre lınga xo hêdi-hêdi onte verê pizê xo, Fincıka henêne dêve çarê vergi ro ke, Verg bolmıs bi, gına uzaro, nêdi rozê xo!

Verg hêsarê xo bi ke, ne qatıra, ne ki kêso!.. Reyna phosema phosema kut´ra raye, vake: ›De so! no ki torê beso!‹ Xo´ve xo qariya, vake: »Lao bomo xêğ! To rastê miye biya, miya xo bure çêfê xode niade! Lawık-vatene çıkê tora menda! Rastê qatıre ama, xorê işta xo ser mırd bure! Piyê to nalbendêni kerda, ya ki khalıkê to nalbendêni kerda! Mıxê lınga qatıre ontene torê menda?«

Xo-xode hêrs bi, qariya, na rayê ki zurra, vake: »Kesê çino ke nıka dı-hirê tarpıku mıro do!«

Vergi se ke hên va-nêva, Xafılde mordemê lewe de vêjiya.

Day pıro dı çüy, vêrdı ra şi raya xora..!

_____________________

Arêker: Hawar Tornêcengi 1) Na sanıke/fable sıfte perloda Tija Sodıri, amor 4, gujige '97 de mı het ra amê nêşir kerdene.