Karber:Mirzali/Çiçege

Wikipediya ra ensiklopediya xosere
Xıl de be pusula Xıl de cıgeyrayışi

Pılemuriye de nahiya Deşte, dewa Qızılmescidi, mazra Raştu de dı çêneki benê. Namê ni çêneku Çiçege u Fate beno. Fate çêna xalê Çiçege bena. Ma u piyê Fate merd bi, a seye bena u çê apê de ho, çê Memedi (Memedê Kemeri) de cüya.

Çiçege hona 15-16 serriye bena. Fate ki dae ra xeylê pil bena. Ni hurdemêna çêneki şiyê mali. Rozê oncia nine mal berdo Merga Çadıre, uza çıraynenê. Nine gegane mali ya ki çiyanê binu sero jüvini de do pêro. Hora Fate zaf hêrsıne bena. Oncia ki Çiçege coru nêşiya, çê de qal nêkerdo. Ae hêfe ho ve pê Fate ardo, ho ve ho vato : “Nêvo kes pede vajiyo, guneka hora sewa, kesê ho çino.”

Çıke beno, a roze ki uza oncia danê pêro. A, Fate na qewğa de zaf qarina, jü kemere cêna erzena. Na kemere sona gınena peyê gosê Çiçege ro. Ae de Çiçege dêm dina ro hard, endi ranêurzena. Goni pıro sona…

Eke beno perroz, Fate teyna malê perroji bena çê, keşi ra ki thowa nêvana. Hama cı ra tavi ke pers kenê, vanê: “Çiçe’ kuya?” Vana: “A hetê Gernu ser şiye. Ewro gaê Merxıke amê kotê çayırê çê api, ine bena Gernu.

Hama zerrê ma u piyê Çiçege reet nêbeno, inam ro Fate nêkerdo. Na sevev ra ine xevere çê api rê rusna ke hala raşti Çiçege şiya uza ya ki nêşiya. Merax kerdo, ho ve ho vato: “Oncia ki se bi, çaê niamê? Çiçege coru caê nêmend bi.”

Beno son, Fate mali ana ke Çiçege oncia tey çina, teynara. Bado, son de endi xevere Gernu ra yena ke Çiçege qe uza nêşiya, uza niya. O ra dıme sarê dewe feneru cêno, kuno ra kou, mergu pê Çiçege fetelino, hama kes ae nêvineno.

Eve na hal dı roji u sewu cı fetelinê. Peyniye de roza hirêine apê Fate Memed (xalê Çiçege) sono Merga Çadıre de meyitê Çiçege vineno. Rozêşiawa bêbexte, uza zaf wes menda, lavatiya; dormê ho de can-çês de menda, heyvetanê ho ver vas qılayno ra / çinıto. Yanê xeylê waxt can onto, hurêndia ho de merda.

Nae ra dıme sawci yeno dewe, ifadê Fate cêno. A ki na rae oncia jüri kena, vana gaê qoçaği do Çiçe’ ro. Sawci inam nêkeno, vano: “Na kerdena gay niya! (No karê gay niyo!)” Hama sarê çêi oncia ki cı rê dewaçi / gerreçi nêbenê. O ra dıme Fate endi uza nêmanena, remena sona lewê zovina keşi manena.

Çêo ke tey manena uza hızmetkarêni kena. Waxtê ra dıme mêrıkê na çêi heseqnena ho ro. Veyvê lazê Sılêman Ağaê Koy de na lafê vejina. Na ra gore hadise mevejiyo deyi uza ra ki remena sona. Nıka vanê hetê Erzıngani de caê de mêrde kerdo, doman u tornê ho estê.

Belkia a ki kerdena ho ra poseman biya! Kam çı zano? Ya ki na jü qeza biya, ae ki kes nêzano. Çıke bi wele biye Çiçege ro. Hona mıradê ho nêreşt bi, çêneka de azeve biye. Seke bi na dewa Fate rê nia mende. ‘Ae sarrê Çiça mı werd’ deyi maa ho bervêne, na lawıke vatêne.


Nuştoğ: Mirzali Zazaoğlu

  • Çiçege waa piyê mına pile, yanê amıka mına xêre biya.

Bıvênên[bıvurne | çımey bıvurnê]