Zazakipediya:Lawıke

Zonê Zazaki de lawıke ra, kılame, şüare (hetê Xozati de), hewa ki vajino. Hetê Dêrsımi de hata serrunê peyênu, sayê ke her hadiseo sosyal veto ro cı, kerdo lawıke. Meselê haskerdene, pêrodaisê aşiru, pêrodaisê verva eskerê Tırki u hadiseê bini lawıkunê Zazay de amê vatene, wertê mıleti de biyê vıla. Lawıkê ke mıleti sero zaf teşir kenê, ca ve ca eve vaten u qeseykerdena uzay zovina tore ra vajiyê. Taê lawıku de namê sayıri beli nêbeno, hama taine de, vajime lawıka Seyıd Qaji de, sayırê ho beliyo. Hama oncia ki a lawıke hetê Pılemuriye de zovina, hetê Halvoriye de torêna vajina. Dı hetê lawıku estê: qesey ve maqam ra.

Lawıkunê xelki de jü hadise heve ve heve, tam vajino. Lawıkê Zazay eve zonê Zazaki bırrinê ra çar parçey:

Hewê Cüamordu

Wertê mıleti de, lawıkê ke pêrodaisê aşiru sero, pêrodaisê Zaza u Tırku sero, waxtê Çiari de pêrodaisê Zazaunê Dêrsımi u eskerê Urışi sero amê vatene, pêroine ra hewê cüamordu vajinê.

Hewê Cêniu

Lawıkunê haskerdene ra ki hewê cêniu vanê.

• Na hurdi torê lawıki hetê Dêrsımi de zaf yenê vatene.

Hewê Govendi

Hewê govendi hetê Dersımi de senıkê, hama hetê Çolig/Bingol u Diyarbekıri de daina zafê.

Hewê Bini

Waxto peyên de, hareketê Zazay ke hetê şiyaseti ra bi berz, eve usılo newe taê mars u kılamê newey ki çıqaşi ke kêm vê, pêda bi. Hetê Dersımi de waxto vıren de lawıki leto jêde eve kemane cınıtêne. Key ke kulturê Tırki hêmê Dêrsım sero hukım kerd, o waxt ra ve nat thamıro sestêlın daina jêde cınino.

Bıvênên

• Lawık û deyiri be zıwanê Zazaki

Nuştoğ: Zılfi Selcan