Dara Hêni ya zi Dara Yeni (be Usmanıcki: داراهينی, be Tırki: Genç) yew qezaya Çoligia. Hama Çolig wılayet nêbi, Dara Hêni xuser yo wilayet bi (heta nimê Diyarbekri bestê Dara Hêni bi, yo waxti zi bestê tay wılayetani binun bi). Yo numey yi zi "Gênc"o. Gênc numey merkezi Dara Hêniyo, tay vuni Tırkiyo, la Tırki niyu. Mena kelima "gênc" ya zi "gênz" Farıski dı "xazine" wo.
Dara Hêni yew qezawa kıhun a. Serrê 1878i dı hıkumetê Osmanıcun idarê xue kerdo newe u wılayetê Bıdlis ardo meydun. Qezê Dara Hêni uca ra yena berd best Bıdlis. Bêntê serrun 1924-1927 dı Dara Hêni bi yew wılayet. Labelê wextê Şêx Seidi dı hıkumati Tırkiya Dara Hêni kerdo xırabi u serrê 1927'i dı Dara Hêni bi yew qezê wılayetê Xarpêti. Serra 1936'i dı wexto go wılayeti Çoligi ume meydan, Dara Hêni bestiya wilayeti Çoligi.
Dara Hêni dı yew belediya merkezı dı u dı belediyê zi nahiyun esti. Hiryes (13) mehlê u hiryesi zi muxtar mehlun esti. İnun ra punc ayê belediyayê, hot ayê nahiyê Siwunê, yew ayê nahiyê Valyera. Dara Hêni di pa qezuna şeşti u dı (62) dewi u dı sey çewres u hirye (243) mazrê esti. Kıştê Dara Hêni ra Ruey Muradi viyerenu. Verarueci Dara Yeni dı yew kuwo berz estu, yani Kuey Ziyari, estu.
