Boglan ya zi Solaxan (be Usmanıcki: صولخان, be Tırki: Solhan, Bongılan, Boğılan) yew qezaya Çoligia. Rocvetışê Boglani de Muş, rocawan de bacarê Çoligi, zımey de Qarliova u Varto, veroc de Diyarbekır u Darê Hêni ca gêno.
Gırdiya erdê qezay Boglani 1114 km²iya. Ena gırdiya erdê qezay Boglani wılayetê Çolig de %13.71'iya. Qeza derya ra 1395 metro berza. Çolig ra 57 km dûria. "Yüzen Ada" sinorê Boglani de ca gêna. Erdê Boglani de zaf koy estê u tayê deştê berzi zi. Nême ra zêde erdê qezay ko u gerişê. Koyê Torosan vera qeza ra vêrenê. Berziya Torosan qeza de 2000 metreya. Serê ena mıntıqa de, koyo tewr berz Koyê Şerafeddinio. Temamê zımey qezay Koyê Şerafeddinio. Cao tewr berz Esentepeyo u berzina xo 2675 metreya. Miyanê enê koyan de hirê deşti estê. Qezay Bogloni de Royê Muradi, awa Buğlani, awa Masalay u derê Bazi vêrenê. Şerafeddin, Ağmasi, Çavkani, Kuçekan, Kendıl, u Kabak deştê qezaê. Şarê qezay Boglani xo rê heywanan kenê weyiye u pê idarey xo keno. Têk zi şarê qezay Boglani eraziya xo de genım (ğele), cew, sayan, gozan u tûyan nanê de.
Namey Solaxan wextê veri de Boglan biya. Serra 1932ıne de namey Boglani pê qanun bi Solhan. O sıre wılayet neww vıraziya u wextan ra Solxan serra 1864ıne de bi qeza wılayetê Erzurumi. Wextê Cengê Dınyaê Yewıne de yew wext Boglan bınê işğalê Urusan de mend. Serra 1929 de nehiya biye qeza u Muş ra gırê diyê. Emma roca 4ê Çeley 1936ıne de Solhan bi qezay Çolig.
Serra 1997 de, amardışê nıfusi de nıfusê qeza pêro-piya 35.327, nıfusê zerrey qeza 17.608 bi. Nıfus ra %49.84 qeza de nışenê ra u %50.36 zi dewan de ronışteyo. Qeza de serê yew km² de, 32 heb insani estê.
Şarê Boglani hama hama pêro Zazayê u Suniyê Şafiyê.
