Zazakipediya:Çıtme Eştenı

Qandê çıtme eştenı qeçi yan zi xorti cayê dı, yanê teberdê dewı yan zi sukı dı, cayê do qumın u nermın dı yenê pêser. Cayê eştenı vanê nerm bo kı wexto kı xo erzenê u kewnê cayêdê cı nêtewo u nêşıkiyo. Çımkı çıtme eştenı dı wexto kı kes xo erzeno lıngê kesi kesi bın ra xijıkênê u kes qenı ser kewno erd. A kewtenı dı cayo siyın u sert bo, mümküno kı kes cayêdê xo bıtewno.

Qandê çıtme eştenı veri xetê ancenê kı, kes a xetı nêravêrno u ay pey ra xo çekero. Ê kı do xo berzê yenê na xetı pey dı wırna lınganê xo anê pê hetı, dıskınenê pê ro u wırnan kenê jew. Ey a tepey a fınê hetê veriya, fınê hetê peya destanê xo benê, anê, xo çewt kenê u xo lerzanenê. Bı nê hereketana heme tendê (bedendê) xo ra qüwet gênê. Lıng, çog u saqandê xo ra qüwet gırot tepey a, xo hetê veriya holkenê u xo erzenê, çekenê. Wexto kı xo çekenê zi vanê lıngê cı pê ra niyabıriyê, ju verni, ju peyni nêşıro. Wexto kı xo çekeno u kewno, jew zi ê cay beli keno. (Yanê peymeno, ka çend xo eşto). Heqê hergı jewi hirê fıni esto xo çekero. Hemını xo çekerd tepey a, bahdê coy, bahdê çekerdenı, o kı en bol xo çekerdo u enbazê xo ravêrnayê o beno ê jewını. Dew u sukandê ma dı zahf xorti xo resnenê pê u şınê rezan miyan dı, erdan miyan dı xo çıtme erzenê. Çımkı hera Rezan zahf nerma. Qandê çıtme eştenı dest nêkewna. Ju ju fını zi xo mewan ser ra çıtme erzenê, ka kam xo vêşi çekeno.

Çıtme dıbabeti yeno eştenı.

• a) Herunda xo dı vınderdena u xo bı holkerdena çıtme eştenı.
• b) Ê dıdını bı vazdana (vazdayışa) amyayena cado belikerdi pey ra, bı holkerdena xo hetê veriya eştena.

Çıtme eştenı rê zahf atikey u hereket lazım o. Ê kı hantaliyê, zey xırarandê pemiyê, qengırd u vêregırdiyê, qelaw u goştıniyê ê nêşenê xo holkerê u çıtme çekerê. O kı xo çıtme erzeno vanê formê cı cadı bo u zeyif bo.

Nuştoğ: Koyo Berz