Vaten:Koyo Berz/Tul

Wikipediya ra ensiklopediya xosere
< Vaten:Koyo Berz(Redirected from Tul)
Tılo bê pusula Tılo bê Geyrayışi

Na kay zi mabêndê çend enbazan dı kay bena. Ê kı qandê na kay kom biyê, xo miyan dı benê dı kışti (dı beşi, dıheti, dı tay) u na kay kaykenê. Na kay rê zi jew çıwe, jew qırmê do hendê bıcewê dergo wırna serê cı rotere u tujkerde, dı hebi zi siyê hendê pê gırdi lazımê.

Nê wırna siyan zey küçandê adılganiya hendê çend gıştan pê ra duri, mabêna pê vero ronanê. (Qalıneya ê qırmi hebê qalıneyda gışta destiya pilı qalınêriya) Ê qırmi (Tuli) anê nanê ê wırna siyan ser u ê çıwey xo ronanê kıştı.

Verê destpeykerdenda kay pışkı çekenê ka kamci kıştı do zere dı, kamci kıştı do şıro tebera bıpawo. Pışka xo çekerdı tepey a, o kı kışta zeri rê kewno o yeno kışta zeri, o kı kışta teberi rê kewno o şıno kışta teberi dı paweno.

Ê kı kışta zeri rê kewtê, inan ra jew şıno ê çıwi gêno, nano ê tuli bına, ê tuli werzaneno hewa u ê çıwedê destê xo ya hewara dano ê tuli ro u ey erzeno duri. (Vera enbazandê teberi). Ê kı kışta teberi dı pawenê, eger inan ra jew ê tuli hewara tepêşo, ê enbazê kışta zeri heme fınê ra veşenê. Eger dest, çar yan zi rewtê kı cı destıdı rê bı inana ê tuli ro do, o kı erzeno o veşeno. Ê kı teber dı pawenê, eger nêşê ê tuli ro dê yan zi hewara tepêşê, ca yo kı o tul kewto o cara ey erzenê ê dısiyê kı ronaybi u sera tul eştbı ê siyan hetı (Yanê cadê qintı). Wexto kı o tul nezdi ê siyan bıkewo u hendê dergeyda ê çıwi mabêndê tul u ê siyan dı çınê bo, fına o kı kışta zeri ra o tul eşto o veşeno. Wexto kı dergeyda çıwi vêşêri bo, o dê kışta zeri bı payandê xo ya mabênê ê tul u ê siyan peymeno, ka çend pay yenê.

Peymıt tepeya no fın erdo çıwedê destê xo ya dano seredê ê tuli ro, ey werzaneno hewa u hewara bı ê çıwedê xo ya dano wertedê cı ro u ey erzeno duri. Wextê werzanayenı dı eger şayo wertedê ê tuli ro do u o tul cayo kı kewto o ca ra duri vısto, no fın mabênê ê cay u cayo kı o tul kewto ê cay bı payandê xo ya peymeno u ê payandê binana arêkeno pêser, cem keno.

O kı ê tuli nano ê siyan ser, ey bı çıwedê destê xo ya hewadano hewa u hewara dano pıro, eger wextê hewa hewadayenı dı hirê fıni pê sero nêşo hewara ê tuli ro do, yan zi hendê çend gaman ey ê siyandê qintı ra duri fino, o veşeno. Hetan kı jew nêveşo, enbazandê ey ra jewna nino kay nêkeno. Vanê jew bıveşo kı, enbazê ci yo bin biro kay kero (Nobetı biro cı kı kaykero). Jew veşeno o bin yeno, hetan kı heme bıveşê. Bı no hesaba heme veşay tepey a, no fın ê kışta teberi yenê kışta zeri, ê kışta zeri şınê kışta teberi.

Çinadê na kay zi esto. Wexto kı hewna dest bı kaykerdenda na kay nêkerdo, xo miyan dı bazar kenê. Ê kışta zeriyê kı enbazê cı veşayê, eger estıbê se payê kı hemverdê xo ra gırotê ê payan ra, her enbazo kı veşayo qandê ey hirıs-çewres pay danê ey u ey fına kenê weş. Zekı o nêveşabo. Tabi no zi bı bazar u qewlkerdena beno.

Bı no hesaba kay qediyê tepey a, payanê xo hesıbnenê, payê kê, kamci kıştı vêşibê, a kıştı qalanê xo fêna a kışta binı ser.

Tabi çina esto, wexto kı dest bı kay nêkerdo qewl ronanê ka do çıçi ser kaykerê. Qewldê xo dı çıçi ronayo, kışta kı kay kerda vıni vanê a kıştı ey inan rê bıgiro. Bahdê kay kes çiyê rê itıraz nêkeno, çıçi vato o yo.



Kay Kay u Wextravêrdene

Bırı  • Cırit  • Çeq  • Çımpıstıkı  • Çıtme eştenı  • Dahfı  • Delame  • Delo  • Derabul  • Dısmalı nımıtenı  • Dısmalı remnayenı  • Eskıjekı  • Gogı  • Govendı  • Gozçal  • Güle  • Hakmêş  • Hakçıq  • Herek  • Hirê lıngı  • Hêlıkı  • Kapok  • Kelasingı eştenı  • La eştenı  • Pere nımıtenı  • Pıst  • Qelanqizık  • Roverdıkı  • Salgoz  • Serê Serı  • Siya nişani eştenı  • Siya qüweti eştenı  • Tazi u Arwêş  • Tir u Tirküvan  • Tul  • Têmane  • Verg u Şıwane  • Veyvekı  • Yazı-Türe  • Zewcı-Ferı