Zazakipediya:Kelasingı eştenı

Na kay zi dı babetiya. Jew kes şeno vajo qandê kaykerdenı u wext pa ravêrdenı, ê dıdını qandê pa lejkerdenı, pê eştenı, dewar u çarwan açarnayenı, teyr u turi eştenı u pa kıştenı erzêna.

Veri vanê ma kelasingı bıdê sınasnayenı, ka kelasingı çıçiya u seni vırazêna. Kelasingı rê bı Kürdi vanê; "Kevkani", Tırki vanê; "Sapan".

Qandê vıraştenda kelasingı hendê metroyê derg dı lay yenê rêsnayenı, yan zi vıraştenı. Eger qenab bıvinê qenab ra zi vırazenê. Ê qenabi rew-rewi nêvısênê. Layê kelasingı vanê bol metin bê kı nêvısiyê. Serê ladê jewi beno helqe kı (gıştanekı) kı ravêro gışta wertiya destê raşti. Çerm ra yan zi postedê dewari ra hendê salda destiya anê, dı kıştanê cı kenê qüli u ê seranê ê layan hergı jewi qülêna weş u metin gırêdanê u kelasingı qandê kar ardenı u eştenı kenê hadre. Kelasingı bi hadre tepeya, siyê weşiyê zey gülana arêkenê u qandê eştenı anê kenê hadre.

Ê helqa ladê gıştaneyêni kenê gışta xo ya werteyêna destê raşti. Ê siyanê topınanê zey güleyan ra juwerı kenê a salda ê çermedê a kelasingı miyan, ê serê layê biniyê vıradayi anê resnenê ê seredê ê ladê gıştaneyıni u gışta xo ya pilı u a şehadeta tepşenê. Wırna serê layan pê dı kerdi zey pê tepeya xo destı kenê berz, cayo kı do berzê nişanê ê cay gênê, kelasinga xo şanenê u serê ê layo kı gışta xo ya pilı u a şehadeta tepışt bı, serê ê lay vıradanê u cayo kı belli kerd bı, nişan gırot bı kı, berzê, a siya qılorına zey güli hetê ê caya erzenê. Vıraştenı u eştena kelasingı wınaya.

Labırê ma cor dı vatbı kı, dı babetiya yena karardenı. Jew qandê kay, jew qandê lejkerdenı, dewar u çarwan açarnayenı u teyr u tur kıştenı u herwına.

Qandê kay, qeç, pil u qızi cayê do dalde dı kom benê u qandê kay xo kenê hadre. Kom bi tepeya benê cayê dı nişan ronanê u yenê cayê do belli ra, bı ê kelasingandê xo ya si çekenê ê nişangehi. Cayo kı nişangey ronanê u si çekenê, vanê çorşmey ê cay dı merdım yan zi bıgan çınêbo kı, qezayê rê mehel nêdeyo. Çımkı siya a kelasingı zey qerşuniya, wexto kı jewi yan zi çiyê do bıganıni ro güno, şena dırbetın kero yan zi bıkışo.

Bı kelasingana si nişan eştena wextê xo kenê pırr u ravêrnenê. Tabi wexto kı erzenê nişan yan zi çiyê, pê dı kewnê şert u qerez zi. Wext beno sero qümar zi kay kenê, yanê perey kenê werte u erzenê nişan. Kam en bol nişan ro do o qezenc keno. Labırê vanê heme zey pê, hendê amorda pê si berzê nişan. Kê kı dı ê amorandê xo dı en vêşi şanê nişan, o beno jewemın.

Ê dıdını qandê leckerdenı yan zi seyd kerdenı kelasingı yena karardenı. Ju ju fını beno xortê dı dewan zi bı kelasingandê xo ya si erzenê pê u pê dı lec kenê. Tay nakışta, tay akışta vındenê u si erzenê pê u pê dı lej kenê. tay zi qandê kıştenı erzenê teyr u tur u jewbi heywanandê binanê werdêkanê zey arwêş u herwına. Tay zi dewar yan zi çarweyê kı bolda xo ra abırênê, erzenê vernida ê dewar u çarwan u inan pa açarnenê bolı miyan.

Lejê kelasingan bol piso. Wexto kı siyêda cı biro cadê mergi ro, sere yan zi cadê alımi ro, merdım şeno pa bımıro. Wexto kı biro cayandê tehlikan ra şena herunı dı rehat kero u bıkışo. Qandê coy pilê ma, gırdê ma, ravey amyayeyê ma nêverdanê ma rew-rewi bı kelasingana lej bıkerê, pê dımı kewê u pa si berzê pê.

Nuştoğ: Koyo Berz