Zazakipediya:Siya Nişani Eştenı

Na kay bı eştenda siyana kay bena. Camêrd, qeç u xortê mahlayê, taxê yan zi ê dewê komê pêser benê u şınê gema siya nişani erzenê. Siya nişani wına erzêna. Pancês-vist metro yan zi gami duri dı (mabêna) siyê, nişanê nanê siyêda gırdı (gırsı) yan zi deyeyê ser. Ê kı do siya nişani çekerê ê nişani, ê şınê xo rê xeylê siyê topê qılorıniyê weşi arêkenê u yenê ê cadê eştenı dı pawenê. O kı inan rê hekemey keno, o inan rê vano mesela şıma hergı jew do des (10) si çekero nişani u ninan pê pey dı keno rêz, ka kam do kê dımı çekero. En sıfteyên dest pey keno u erzeno, çekeno. Çend si raştê, isabetê ê nişani kerdê, hekem hend si qandê amorda pırodayenda, isabetkerdenda ey ronano koşeyê. (Tabi hergı fına kı raştê (isabetê) ê nişani kenê u o nişan kewno, jewna merdım şıno ê nişani cadê veri dı ronano). Bahdê eştenda hemını, amoranê inan cê ra vejenê, kê kı vêşi eştê u dayê pıro o qezenc keno.

Çinadê na kay esto, o zi no yo, o kı erzeno u dano ê nişani ro u ê nişani gamê dı gami cadê cı ra fêno duri, a derba ey dı derbi yena hesıbnayenı. O kı siya cı erd ra leyri bena u yena ê nişani ro zi, a derba ey nimderbı yena hesıbnayenı. (Yanê derba kı erzeno a derbı direk nina ê nişani ro, cı vero yena erd ro u holbena yena cı ro, a derbı nim derba).

Tabi siya nişani eştenı rê zi nişancinı (Nişanwaney) lazıma. Wıni salme eştena kes nêşeno nişani ro do. Vanê çımê kesi duri weş bıvinê, qeratiyê nişani weş belikerê, destê kesi nêlerzê u tay (Balans) kesi cadı bo, herunı dı bo kı kes bışo pıro do. Wexto kı taya (balans) kesi herunı dı nêbo u destê kesi bılerzê, hedefo kı eşto, rew rewi o hedef ro nêgüneno. Çımkı siya kesi raşt nêşına kı hedefi ro güno.

Çıme

• Koyo Berz