Vaten:Koyo Berz/Çeq

Wikipediya ra ensiklopediya xosere
< Vaten:Koyo Berz(Redirected from Çeq)
Xıl de be pusula Xıl de cıgeyrayışi

Çeq (Lastıkê mıriçıki kıştenı): Çeq qırmêdê qelqeyıno (Qılqeyıno) zey gıştı qalıni ra vırazêno. Wexto kı dewı zi mêşan miyan dı velg cınenê, yan zi koli vejenê, kamcin gılê ê daran rewtınê qelqeyıniyê inan cı ra abırnenê. Ê darê qelqeyıni hendê çıhar-panc gıştan cêrdê ê qelqi ra cıkenê. Ê qelqeyanê ey zi hergı jewi hendê çıhar-panc gıştan derg verdanê u inan sera cıkenê. Serê ê qelqan wırnan kenê kertı kı, kı lastıko kı pa gırêdê cı ra nêxijıkiyo u nêvıziyo, yan zi nêreyo. Hergı kertıka hendê bıcewunim derg, hendê nenguyê hera lastikê anê u bı ê kertıkana weş gırêdanê. Vanê o lastıko kı bı ê kertana gırêdayo bıanciyo, derg bo u fına vıradeyo. Tabi hebê zi vanê sert bo kı, siya kı miyan ra erzêna şıro duri, yan zi xeylê bıqüwetı bo. Postedê dewari ra hendê salda desti kefêdê kelasingı zi anê, wırna kıştanê cı kenê qüli, serê ê lastıkan cı ra ravêrnenê u weş ê lastıkan bı ê çermiya gırêdanê. Yanê serêdê ê lastıkan kertıkandê qılandê ê qelqeyandê çeqiya u ê serê bini zi kefdê posteyıniya gırêdanê u çeqê xo qandê eştenı kenê hadre. Lastêkê xo yê si eştenı kerd hadre tepey a no fın şınê xo rê siyê qıloriyê zey gülilıkda çımana, zey güleyandê camınana (cincıqênana) werdiyan arêkenê u anê.

Ê siyê kı arêkerdê u ardê inan jew bı jew kenê ê kefdê ê lastıki miyan, destey ê çeki kenê destê xo yo çep, kefê ê lastıki zi kenê destê xo yo raşt u wertedê ê qelqeyan ra vera xo ê lastıkan ancenê. Rınd vera xo anti tepey a cayo kı, nişano kı do berzê cı bı çımandê xo ya, mabêndê ê wırnan qelqeyandê ê çeqi ra nişanê ê çi yan zi ê cay gênê u ê kefê ê lastıki bê lunayenı, bêlerzanayenı xo dest ra vıradanê. A si ê kefdê çeqi miyan ra, mabêndê ê wırna gılandê ê qelqeyan miyan ra şına u günena hedefdê xo ro. Qeç u xorti benê cayê dı nişan ronanê u bı ê lastıkdê si eştena, siya lastıki erzenê o nişan. Bı no hesaba xo rê kay kenê u wextê xo ravêrnenê. Tabi wexto kı si erzenê nişani bol diqet kenê kı çorşmey ra kes nêravêro u a siya kı erzenê ey ro nêgüno. Çımkı a siya kı ey miyan ra vıjêna zey qerşuniya, şena merdım bıkışo. Gırd u werdi hım bı nê çeqandê xo ya si erzenê nişanan u hım zi bı nê çeqana mıriçıki, teyr u tur kışenê. Siya ê çeqi biro kamcin teyr u turi ro reyayışê cı çıniyo. Amnani, wextê amyayenda teyr u turi qeç u xorti çeqanê xo gênê u şınê dar u beri bındı, nezdi aw u awiyan dı seydê nê teyr u turi kenê u inan bı nê çeqandê xo ya kışenê.

Çiyê esto vanê ez biyara wendewanan viri, kes bı ê çeqandê xo ya nêşeno pê dı lej bıkero u bı inan a si çekero pê. Ê kı bı inan a si çekerê pê vanê dışmenê pê bê. Qandê coy gırdê ma qandê nê kayan sinor u qanunê xo rê ronanê u qeçanê xo tembe kenê kı, riayetê ê çiyan bıkerê. Yanê qandê kıştenı nêbo, bı çeqana si pê eştenı temam men o, yasaxo. Çımkı derba cı zey derbda qerşuniya, biro cadê olımi ro, cadê mergi ro şena ey bıkışo yan zi seqet verdo. Qandê coy gırd u pilanê ma xo miyan dı lecê çeqi men kerdo. Qeç u xortê ma zi riayetê ê meni kenê



Kay Kay u Wextravêrdene

Bırı  • Cırit  • Çeq  • Çımpıstıkı  • Çıtme eştenı  • Dahfı  • Delame  • Delo  • Derabul  • Dısmalı nımıtenı  • Dısmalı remnayenı  • Eskıjekı  • Gogı  • Govendı  • Gozçal  • Güle  • Hakmêş  • Hakçıq  • Herek  • Hirê lıngı  • Hêlıkı  • Kapok  • Kelasingı eştenı  • La eştenı  • Pere nımıtenı  • Pıst  • Qelanqizık  • Roverdıkı  • Salgoz  • Serê Serı  • Siya nişani eştenı  • Siya qüweti eştenı  • Tazi u Arwêş  • Tir u Tirküvan  • Tul  • Têmane  • Verg u Şıwane  • Veyvekı  • Yazı-Türe  • Zewcı-Ferı