Nilüfer Akbal

Wikipediya, ensiklopediya xosere ra
Nilüfer Akbal
Melumato şexsi
Dewlete Tırkiya
Cınsiyet Cêniye
Cayê biyayışi Varto
Biyayış
Gure Muzisyen
Zıwani Tırki
Enstrumanê cınıtışi Vokal

Nilüfer Akbal yew sanatkara Zazaya. Serra hezar û new sey û şêştî hewt de qezaya Muşî Gimgim (Varto) de maya xo ra bîya.

Heyatê aye[bıvurne | çımeyi bıvurne]

Nîlufer Akbal mektebo verên û lîsa Gimgim de qedînayo. Serra 1987 de ameya Estanbol, bînateyê (bîntare) 1988-90 de şîya mektebê muzîkê Arif Sağî de dersa solfej û sazî girewta. Serra 1991-92 de zî Timur Selçuk Çağdaş Sanat Merkezi de dersa şanî girewta. Dime ra pê Wezifedara Tedrisatê İstanbul Devlet Operası Begûm Erdem ra dersa şanî dewam kerda. Nîlüfer Akbale muzîkî sera tedrisatê xo Estanbol dima Almanya de dewam kerdo, 1994 de Rheinische Musikschule de hîrê sêrrî dersa şan û opera gırewta.

Tirkîya de (Estanbol, Antalya) û tebera zaf qonserî dayî. Serra 1989 de Swêd (Îswec) - Stokholm; 1990 de Almanya - Stuttgart; Awısturya - Insburg, Wîyana; 1991 de Danîmarka - Kopenhag; Almanya - Duîsburg, Hamburg; Îswîcre - Basel; 1992 de Îngîltere -Londra, Fransa - Strasburg, Mulhaus, Parîs; Almanya - Bîlefeld, Berlîn, Koln; Swêd - Stokholm; 1993 de Almanya - Munîx, Glesen; Hollanda - Rotterdam; 1994 de Hollanda - Arnheim; Almanya - Stuttgart, Koln, Nunberg, Nuîsburg, Hamburg, Berlîn, Essen; Fransa - Parîs, Nant, Îswicre - Lozan û bajaranê Hollanda -Amsterdam, Rotterdam de qonserî dayî, eẍleb zî nê bajaran de vaca qonseran.

Bîra qonseran Nîlüfer Akbal, zaf radyo û TV de programî viraştê. 1991 de Radyoyê Kolni, 1992 de Fransa de Radyo Malhaus, Îswîcre de Radyoyê Cênevra, 1993 de Almanya û Fransa de TVyê Arte de program viraşti.

Nîlüfer Akbal, muzîkê "rayontî" hesebnena, qebul kena. Maceraya muzîkê xo zî otîr hesebnena. Haydarên muzîkî wexto ki naye bizanên, muzîkê Nîlüfere de menaya enstrumananê ẍerîban hînî baş fam kênî. Akbal, eẍleb muzîkê şelikî (halk/folk) sera xebat kena, çimeyê muzîkê Akbale kulturê şelikî yo. Nîlüfer Akbal muzîkî sera hem tedrîsatê rojvetişî hem zî rojawan ra vîyerta. Yew het ra saz, heto bîn ra zî şan û opera. Ca-ca tesîrê caz zî bêllu beno, muzîkê Akbale de.

Xisusîyetê Akbale tenya ferqê vengê aye ra nêyeno. Tayê lawikan (kilam) de şixulnayişê vengê aye eşkera aseno. Yew kilame de yogering zaf tonan de wanena, wanayişê xo de zî qet cefa nêancena.

Xebatê Nîlüfer Akbale[bıvurne | çımeyi bıvurne]

"Arzuhal Eyledim" albumê ayo verêno. 1991 de bi amadekarîya Hasret Gultekîne albumê "Newroz 1-2" de be Kurdkî lawîkî vatî. Serra 1992 de fîlmê Mazlum Çimen "Mem û Zîn" de tewrê Firat Başkale yê şîwanî vatî. Na serre de albumê "Ben Bir Kadınım" veto.

Xebatê muzîkê Nîlüfere bi albumê "Mîro" aver şîyo. No album 1995 de vêjîya. Inî albumî de Zazakî, Kurdkî û Tirkî pîya vatî. Albumanê xo de hem besteyanê xo vana, hem zî ca dana muzîkê Zazakî û Kurdkî yê otantîkî. Derheqê muzîkê Nîlüfere de zaf krîtîkeran tesbîtê "zafvengêne" kerdo. Mîsalê zafvengêne albumê aye "Revîngî" yo.

Nika hefte de yew roje TRT6 de be nameyê Buka Baranê de yew program virazena.

Albumê Nîlüfer Akbale[bıvurne | çımeyi bıvurne]

  • Arzuhal Eyledim (Kilamî/Lawikî), 1987
  • Barıştan Resitaller, 1990
  • Dört Telde Dört Dilden, 1991
  • Newroz 1 (Şîwen, Kurdkî, Zazakî), 1991
  • Newroz 2 (Şîwen, Zazakî, Kurdî),1992
  • Ben Bir Kadınım, 1992
  • Mîro, 1995
  • Rewingi, 1998
  • Raye, 2002
  • Şewa, 2005

Sitey[bıvurne | çımeyi bıvurne]