Zazakipediya:Eskıjekı

Eskıjekı (Eskızekı) na kay bı çi nımıtenı, yan zi xo nımıtena kay bena. Na kay kaya qeçkandê (Domanandê) werdiyênana. Gırdi, Pili na kay qeçkandê werdêkana danê kaykerdenı. Jew do gırd u zanaye qeçanê dewı yan zi ê mahlayê arêkeno pê ser. (Yanê cayê dı qandê kaykerdenı ano pêser, komê pê ser keno). Eger do çiyê bınımnê, verê nımıtenı qeçkan hemını rê vanê çımanê xo bıgirê, ma yê kenê nê çi bınımnê. (Çiyo kı do bınımnê sıfte mısnenê hemını kı bızanê çıçiyo kı, şaşeya çina nêgirê) Qeçkan çımê xo gıroti tepey a, çiyo kı verê nımıtenı mısnabı qeçkan u vat bı ma do ney bınımnê, ê çi nımnenê. Nımıt tepey a o kı o çi nımıto o yeno vano: Eskıjeka mın a surekı, Naneka mın a tenurekı, Qeçekê mahla cêr u cori, Nami bıgi sera şınê şori.

Wêrê nami bıvinı u bêri, Biya ma rê xebera xeyri. Bıgi xelata xo ya heriri, Tım na rojı biya xo viri. Bahdê nê vatenan qeçeki çımanê xo akenê u hergı jew kıştê ra şıno geyreno o çiyo kı Mısnayoxê inan nımıt bı, ê çi. Eger çi nımıto geyrenê çi, eger qeçekê xo nımıto, geyrenê ê qeçeki. O kı ê çi yan zi ê qeçeki bıvino ey rê xelatı danê. Not: Xeylê babetê kaykerdenda na Eskıjekda surıkı estê, labırê şıma mı ef bıkerê hemeyê cı ninê mı viri.

Na dêra eskıjekda surekı dıha derga, labırê a zi temamê cı nino mı viri. Xeyrdê xo enbazê kı raştê cı u temamê cı zanê, eger bınuşnê u mı rê bırışê ez do pa zahf kêfweş ba. Folklor, Kültür, Edet u Torey ma mı rê parçeyêdê gandê mın ê, wexto kı jew cayê dı nuşneno u ez wanena, ez pa zahf kêfweş bena. Ellay (Homa) ra zahf kêfweşeyê u şênayeyê danê mı.

Nuştoğ: Koyo Berz