Zazakipediya:Salgoz

Salgozı salê sero siyêda zey Gozana topı ronanê u siyandê salênana erzenê cı. Qandê coy zi namey na kay salgozı neyayo pa. Na kay bı siyana kay bena. Çend enbazi benê wa bıbê na kay kay bena. Ê kı wazenê na kay kaykerê, veri hergı jew xo rê siyêda pıhanına (siyêda salına) destana weşa duzı vinenê. Bahdo zi siyêda verdê ro (Fırat) ya topa zey gozı, zey güli vinenê. Salê pıhani u siya topını di tepey a, yenê meydanê do duzo hera dı, salê yan zi siyêda pıhana kı erdi miyan dı sabita kı herunı ra nêlüwena u berzeya cı hıma hıma berzeyda erdi dı ra, erdiya jewa yan zi çend gışti erdi ra berza, a salı yan zi siyerı qandê kaykerdenı xo rê weçinenê. A siya xo ya topa zey gozı nanê a salı ser, şeş yan zi heta desmetroyan, yan zi desgaman a salı ra kewnê duri u xo rê nıxta salandê destê xo eştenı vırazenê. O nıxteyo kı qandê si eştenı xo rê belikerd bı, o ca ra siya pıhana destê xo erzenê a siya topa kı a salı sero ronêbi a siyerı. Kê dê a sida topa serdê salı ro u a si a salı sera vıstı, o şıno bı payda lıngda xo ya, mabênê cayê vıstenı u a sida topı peymeno, hele çend pay qintı ra kewta duri. Çend pay şiya hendı qali keno ê enbazandê xo yê a kay kaykerdan ro. A si a sala pıhanı sera vıstı tepeya, no fın dest bı turdê dıdını kenê. Turdê dıdını dı o kı en sıfte sala destê xo eştıbi a sida topına zey Gozı, no fın o şıno en peyni, ê dıdını yeno en verni. Bı no hesaba, sıreyêna pê pey ra vırênê. Kes heqê kesi nêweno u kesi rê neheqey nêkeno. Bahdê qedyayenda kay, kê çend pay çekerdê ê payan şanenê pê ver, pê ra (têmıyan ra) vejenê. Ê kê vêşi manenê, o qalanê xo fêno ê binan ser u a kay qezenc keno. Bı no hesaba çıhar-panc seati wextê xo yê vengi bı na kaya pırr kenê u ravêrnenê.

Nuştoğ: Koyo Berz