Mesut Asmên Keskin
| Mesut Asmên Keskin | |
|---|---|
 | |
| Melumato şexsi | |
| Dewlete | Tırkiya |
| Cınsiyet | Camêrd |
| Cayê biyayışi | Estanbol |
| Biyayış | |
| Gure | Nuştekar û Çarnaoğ |
Asmêno Bêwayir (namey xo'yo raştıkên Mesut Asmên Keskin) yew cıgeyraoğo Zaza u mordemê ilmê zıwananê (zıwanzanê) Hind-Ewropao. Serra 1973ine de Estamol de ame riyê dınya. Keyey xo taê serri raver dewa Mazra Sılêmanu, Pılemoriye (Dêrsım) ra bar kerdo, ameo Estamol. 1975 de piyê ey o be maya cı ra ardi Almanya. Ae ra nat na dıwele de weşiya xo rameno. Almanya de şi mekteb. 1992 de kewt universıte u mıhendısina makina (vıraştena makina) heta lisansê veri wende.
Oyo ke Zazaki verê coy tenê areze (fehm) kerdêne, emma qısey nêkerdêne. 1993 de dest kerd zıwanê ma u piyê xo, gına sero, musa. 1996 de redaksiyonê pêseroka Warey de ca gırewt. 2005 ra heta 2008 ki redaksiyonê pêseroka Mirazi de ca gırewt. Taê gurenayışê xo'yê zıwani, nuştey, kılamê xo kıtaban u pêserokan u internet de veciyay (taê ebe namey xoyê keyey, Mesudê Keşki). Taê kıtabi u xeylê nuştey nuştekaranê Zazaki redakte kerdê. 2013yıne ra nat pêseroka MA de nuştan redakte keno, yew ki pela internetia Zazaki Zazakikozmos [] de u tepeya [./Http://www.zazaki.com.tr www.zazaki.com.tr] de ki nuseno u editorine keno. Editorê pelga www.zazaki.de u ezaê diwanê idarey Enstitüyê Zazakiy u Cematê Zazayanê Almanyao. Taê nuştanê pêseroka Piltani ki redakte keno. Hewna ki Wikipediya Zazaki de admino.
Nıka Frankfurtê Maini de diwanê idarey Enstituyê Zazaki de gureyeno u zemanê temsilkarê pêseroka Miraziê Ewropa bi. 2005 ra heta 2008 Universıtey Frankfurtiê Goethey de qısmê ilmê zıwanan de ilmê têverşanaena zıwanan (ilmê qıyasê zıwanan) de lızgey Hindo-Ewropaistiki (Indogermanistik) wend. Payizê 2008ıne de teza xoya mastıri dê zerre. Teza xo diyalektanê Zazaki sero nuşte. Çıle (Kanuno Peyên) 2009 de wendışê universıtey qedena. 2009ıne ra nat teza xo'ya doktora eyni universıte de vırazeno. Universıtey Frankfurti de 2009 - 2016 dersa zıwanê Zazaki dae. 2020-2021 de ki ê universıtey de gramerê Zazaki sero seminer da. Yew ki Gulana 2020 ra heta 2024 u reyna Gağandê 2025 ra heta nıka namey Enstitüyê Zazaki ra dersa Zazaki online (internet de) salıx dano.
Keskini Şazadeo Qıckek Küçük Prens çarna Zazaki, serra 2009ıne de kıtab de Almanya de veciya. Kıtabê ey'ê dersa Zazaki be terifê Almanki, be namey Zonê Ma zanena? Gağandê 2012yıne de be destê projey taê embazan u nuskaran veciya. Guciga 2017ıne de ey çarnayışê Şazadey Qıckeki be halo rocanekerde newede İstanbol de, Dersim Yayınları de vet. Nê vetışxaney de ki Nisana 2017ıne de kıtabê xo'yê derse Zonê Ma Zanena? Almanki ra çarna Tırki u pê Zazakiyê Hemıne be namey Şıma Zazaki zanenê? ra vet. Kıtabê xo'yê derseo ke Tırki de veciya, pê metodanê ilmi standardizekerdena Zazaki rê gamê da verêna. Kıtabê derse Almanki ra çarniya Franszıki ki, o de nezdi de bıveciyo, çarniya Ermenki ki, o ki hewna vetış rê hazır beno. Karê etimolociya (rêçıkzanayışê) Zazaki sero ki gırwey xo hao dewam keno. Kıtabê ey "Identitätsdynamik und Ethnizität der Zaza-sprachigen Bevölkerung zwischen Fremdzuschreibung und Selbstverortung" ('Dinamikê kamiye be etnisitey qıseykeranê Zazaki mabeynê etfê teberi u xo ca kerdene de') peyniya 2025ıne de be Almanki Almanya de veciya.
Bıvênên
[bıvurne | çımeyi bıvurne]- Asmên
- Zonê Ma Zanena? - Zazaki für Anfängerinnen und Anfänger Archived 2013-09-27 at the Wayback Machine
- Şazadeo Qıckek - Zazaki Archived 2018-09-12 at the Wayback Machine
- Şıma Zazaki Zanenê? - Yeni başlayanlar için ders kitabı - Standard Zazaca yazı dili (Zazakiyê Hemıne Archived 2019-04-09 at the Wayback Machine)
